Jizzах vilоyati hоkimligi

Milliy statistika qo‘mitasi ma’lumotlariga ko‘ra, 2025-yilda O‘zbekiston bo‘yicha tug‘ilish koeffitsiyenti har 1 000 nafar doimiy aholiga nisbatan o‘rtacha 23,2 nafarni tashkil etgan.

Hududlar kesimida ushbu ko‘rsatkichlar tahlil qilinganda, Jizzax viloyati 24,1 nafarlik natija bilan yuqori o‘rinlardan joy olgani e’tiborga loyiq. Bu esa viloyatda aholi sonining tabiiy o‘sishi barqaror kechayotganini anglatadi.

Shu bilan birga, Namangan (23,9 nafar), Farg‘ona (23,5 nafar) va Andijon (22,8 nafar) viloyatlarida ham tug‘ilish ko‘rsatkichlari respublika o‘rtacha darajasidan yuqori ekani kuzatilmoqda. Qolgan hududlarda esa mazkur ko‘rsatkich biroz pastroq bo‘lib, masalan, Toshkent shahrida 19,8 nafar, Qoraqalpog‘iston Respublikasida esa 19,2 nafarni tashkil etgan. Jizzax viloyatida tug‘ilish ko‘rsatkichlarining yuqori bo‘lishi, avvalo, oila institutining mustahkamligi, aholining ijtimoiy qo‘llab-quvvatlanishi hamda hududlarda amalga oshirilayotgan kompleks ijtimoiy-iqtisodiy islohotlar bilan bevosita bog‘liq.

Ayniqsa, so‘nggi yillarda viloyatda yangi ish o‘rinlari yaratilishi, uy-joy qurilishi, tibbiyot va ta’lim tizimida amalga oshirilayotgan islohotlar aholining turmush darajasiga ijobiy ta’sir ko‘rsatmoqda. 

Bu esa o‘z navbatida, yosh oilalar soni ortishi va farzandli bo‘lishga bo‘lgan ishonchning mustahkamlanishiga xizmat qilmoqda. Xulosa qilib aytganda, Jizzax viloyatida demografik jarayonlar ijobiy tendensiyaga ega bo‘lib, tug‘ilish ko‘rsatkichlarining respublika o‘rtacha darajasidan yuqori ekani hududning barqaror rivojlanayotganini yana bir bor tasdiqlaydi.