Jizzах vilоyati hоkimligi

Yig‘ilishda, shahar tuman hokimlari soha mutaxassislari va joylardan mas’ullar ZOOM platformasi orqali ishtirok etishdi. 
 
Unda sohadagi mavjud kamchiliklar, aholini qiynayotgan muammolar hamda ularni bartaraf etish choralari atroflicha muhokama qilindi. 
 
Bugungi kunda viloyatning 1,5 million nafar aholisidan 402 ming nafari, ya’ni 26,8 foizi jamoat transporti xizmatidan foydalanmoqda. 
 
O‘tgan yili Jizzax shahriga 101 ta yangi avtobus olib kelinib, jamoat transportida brutto-shartnoma asosida elektron to‘lov tizimi joriy etildi. Ushbu tizimga ko‘ra, transport kartasi orqali to‘lov amalga oshirilganda 30 foizlik chegirma, bir soat ichida ikkinchi marta foydalanilganda 50 foizlik chegirma, uchinchi marta avtobusga chiqilganda esa bepul yurish imkoniyati yaratildi. 
 
Mazkur tizim Jizzax shahridagi barcha 34 ta mahalla va shaharga tutash Sharof Rashidov tumanidagi 12 ta mahallada joriy etilgan. Amaldagi tartibga ko‘ra, shahar avtobuslari shahar hududidan 2 kilometrgacha chiqishi mumkin. Shu asosda tumanning yana 19 ta mahallasini qamrab olish imkoniyati mavjud. 
 
Viloyat hokimi Transport boshqarmasiga tijorat banklari bilan hamkorlikda tashabbuskor tadbirkorlarni jalb etib, zarur avtobuslarni olib kelish choralarini ko‘rish bo‘yicha topshiriq berdi. Bu orqali qo‘shimcha 65 ta mahallada jamoat transporti xizmati yaxshilanishi kutilmoqda. 
 
Tahlillar shuni ko‘rsatmoqdaki, viloyatdagi 120 ta mahallada avtobus qatnovi yo‘lga qo‘yilmagan. Ularda asosan mikroavtobus va “Damas” transport vositalari xizmat ko‘rsatmoqda. Yana 3 ta mahallada yengil taksi orqali qatnov ta’minlangan. 
 
Yig‘ilishda viloyatdagi barcha 304 ta mahallada qayta xatlov o‘tkazish, aholi fikrini o‘rganish va alohida dastur ishlab chiqish vazifasi qo‘yildi. Shuningdek, chekka tumanlarni markazlar bilan bog‘lovchi yo‘nalishlarni qisqartirilgan va tezlashtirilgan marshrutlarga aylantirish, turizm obyektlari va ziyoratgohlarga jamoat transporti qatnovini yo‘lga qo‘yish zarurligi qayd etildi. 
 
Jamoat transporti samaradorligi bekatlar holati bilan bevosita bog‘liq. Hozirda viloyat bo‘yicha 535 ta avtobekat mavjud bo‘lib, ularning 331 tasi Avtomobil yo‘llari tashkilotlari, 174 tasi tadbirkorlar, 30 tasi esa shahar va tuman obodonlashtirish boshqarmalari balansida. 
 
O‘rganishlar natijasida qator bekatlar talab darajasida emasligi aniqlandi. Jizzax shahridagi 86 ta bekatning asosiy qismi tartibga keltirilgan bo‘lsa-da, 30 tasi haligacha ta’mirtalab. Qator tumanlarda ham bekatlar yomon ahvolda yoki umuman mavjud emas. 
 
Ayrim joylarda bekatlar tadbirkorlik maqsadlariga moslashtirilib, yo‘lovchilar uchun kutish joylari yopib qo‘yilgan. Shuningdek, avtobuslar to‘xtashi uchun “karman”lar yo‘qligi, nogironligi bo‘lgan shaxslar uchun sharoit yaratilmagani ham tanqid qilindi. 
 
Viloyat hokimi o‘rinbosari Shuhrat Djurayevga hokimlar bilan birgalikda ishchi guruh tuzib, barcha bekatlarni qayta xatlovdan o‘tkazish, ularning belgilangan talablarga muvofiqligini tahlil qilish va aniq takliflar kiritish vazifasi yuklatildi. 
 
Yig‘ilishda, jamoat transporti faqat qatnov vositasi emas, balki aholi kayfiyati va turmush darajasiga ta’sir ko‘rsatuvchi muhim ijtimoiy xizmatligi ta’kidlandi. Mavjud muammolarni tizimli hal etish orqali viloyat aholisi uchun yanada qulay va samarali transport tizimini shakllantirish asosiy maqsad qilib belgilandi.