FVV Akademiyasida Respublika ilmiy-amaliy anjumani bo‘lib o‘tdi. Anjuman doirasida o‘zaro hamkorlik to‘g‘risida memorandum imzolandi
2025-10-31 14:55:00 / Yangiliklar
FVV Akademiyasida "Favqulodda vaziyatlarning oldini olish va ularni samarali bartaraf etish: muammo va yechimlar" mavzusida Respublika ilmiy-amaliy anjumani bo‘lib o‘tdi.
Mazkur tadbirda O‘zbekiston Respublikasi Favqulodda vaziyatlar vazirligi, "Mirzo Ulug‘bek" nomidagi O‘zbekiston Milliy universiteti, O‘zbekiston Respublikasi Mudofaa sanoati agentligi tasarrufidagi “Innovatsiya texnologiyalari markazi”, Favqulodda vaziyatlar vazirligi ilmiy-innovatsion va sinov-tadqiqot instituti, Toshkent kimyo-texnologiyalari ilmiy tadqiqot instituti, O‘zbekiston Fanlar akademiyasi Polimerlar kimyosi va fizikasi instituti, Favqulodda vaziyatlar vazirligi Fuqaro muhofazasi instituti, Favqulodda vaziyatlar boshqarmalari, oliy ta’lim muassasalari professor-o‘qituvchilari va kursantlari, shuningdek, ommaviy axborot vositalari vakillari ishtirok etdi.
Anjumandan koʻzlangan asosiy maqsad — favqulodda vaziyatlarning oldini olish, ularni samarali bartaraf etish, xavfsizlikni ta’minlash, zamonaviy ilmiy va texnologik yondashuvlar asosida innovatsion yechimlarni ishlab chiqish hamda tajriba almashish imkoniyatlarini kengaytirishdan iboratdir.
Tadbir davomida yetakchi olimlar, mutaxassislar va amaliyotchi ekspertlar tomonidan dolzarb mavzularda ma’ruzalar tinglandi, favqulodda vaziyatlar sohasida ilg‘or ilmiy yondashuvlar, yangi texnologiyalar va ularning amaliyotdagi qo‘llanilishi bo‘yicha fikr almashildi.
Anjuman doirasida O‘zbekiston Respublikasi Mudofaa sanoati agentligi tasarrufidagi “Innovatsiya texnologiyalari markazi” hamda O‘zbekiston Respublikasi Favqulodda vaziyatlar vazirligi ilmiy-innovatsion va sinov-tadqiqot instituti o‘rtasida ikki tomonlama hamkorlik memorandumi imzolandi.
Mazkur hujjat favqulodda vaziyatlarning oldini olish va ularni samarali bartaraf etish sohasida qo‘shma ilmiy-tadqiqot ishlari olib borish, innovatsion texnologiyalarni joriy etish, ilmiy almashinuvni yo‘lga qo‘yish hamda kadrlar salohiyatini oshirish borasida o‘zaro hamkorlikni yanada mustahkamlashga xizmat qiladi.