Favqulodda vaziyatlar vaziri general-mayor B.B.Kudratxodjayev boshchiligida Qoraqalpogʻiston Respublikasi va Xorazm viloyatida qoʻmondonlik-shtab oʻquv mashqlari boshlandi.
2025-10-21 11:30:00 / Yangiliklar
Dastlab barcha mexanizatsiyalashtirilgan yigʻma otryadining saf koʻrigi oʻtkazilib, FVDT xizmatlarining kuch va vositalari koʻzdan kechirildi.
Shundan soʻng, Qoraqalpogʻiston Respublikasi va Xorazm viloyati hududida energetika va kommunal soha obyektlarining 2025/2026-yillar kuz-qish mavsumiga tayyorgarlik koʻrish, mavsum davomida issiqlik va energetika tarmoqlarini barqaror ishlashi, sodir boʻlishi mumkin boʻlgan favqulodda vaziyatlar va yirik avariyalarning oldini olish hamda yongʻin xavfsizligini taʼminlash tadbirlarini samarali tashkil etish boʻyicha amaliy harakatlar sinovdan oʻtkaziladi.
Shuningdek, jarayonda aholini favqulodda vaziyatlarda toʻgʻri harakat qilish, yuzaga kelishi mumkin boʻlgan favqulodda vaziyatlarda talofatlarni oldini olish, qutqaruv tuzilmalari va fuqaro muhofazasi tuzilmalarini qutqaruv ishlari hamda kechiktirib boʻlmaydigan boshqa ishlarni bajarish, fuqaro muhofazasi sohasi tayyorgarligini oshirishga alohida eʼtibor qaratiladi.
Eslatib oʻtamiz, oʻquv mashqlari Qoraqalpogʻiston Respublikasi va Xorazm viloyati hududidagi bir nechta obyekt va manzillarida bir vaqtning oʻzida oʻtkaziladi va 23-oktyabr kuniga qadar davom etadi.
