FVV Akademiyasida "Temur tuzuklarining shaxsiy tarkibni tarbiyalashdagi maʼnaviy-axloqiy ahamiyati" mavzusida davra suhbati bo‘lib o‘tdi
2025-10-07 17:50:00 / Yangiliklar
Tadbir davomida buyuk davlat arbobi Amir Temur tomonidan yaratilgan “Temur tuzuklari” asarining tarixiy ahamiyati, unda ilgari surilgan adolat, jasorat, intizom, vatanparvarlik kabi fazilatlarning bugungi yoshlar tarbiyasidagi o‘rni haqida atroflicha fikr yuritildi.
O‘zbekiston xalq artisti Tesha Mo‘minov o‘z chiqishida Temur tuzuklarining zamonaviy hayotda, ayniqsa, harbiy xizmatchilar uchun muhim o‘rnak ekanini taʼkidladi. Shuningdek, u yoshlarni maʼnaviy jihatdan yetuk, vataniga sadoqatli bo‘lishga daʼvat etdi.
Tadbir doirasida Akademiyada a'lo baholarga oʻqib, safdoshlariga oʻrnak boʻlib kelayotgan 4 nafar iqtidorli kursantlarga Favqulodda vaziyatlar vazirining tegishli buyrugʻi bilan Favqulodda vaziyatlar vazirligining "Amir-Temur" nomidagi davlat stipendiyasi va faxriy yorliqlari Akademiya rahbari va ustoz Tesha Moʻminovlar tomonidan tantanali topshirildi.
Davra suhbati jarayonida kursantlar o‘zlarining qiziqtirgan savollari bilan murojaat qildilar va mehmon bilan fikr almashdilar hamda Akademiyaning "Faxriylar kitobi"ga ustoz Tesha Moʻminov oʻz dil izhorlarini yozib qoldirdilar. Tadbir yakunida Akademiya rahbariyati O‘zbekiston xalq artisti Tesha Mo‘minovga mazmunli suhbat uchun o‘z minnatdorligini bildirdi.