Muhtaram ustozlar, aziz faxriylar! 

Barchangizni “1 oktyabr – O‘qituvchi va murabbiylar kuni” munosabati bilan samimiy muborakbod etish bizga ulkan mamnuniyat bag‘ishlaydi. Chunki ustoz degan muqaddas nom har bir inson taqdirida yuksak o‘rin egallaydi.

Dunyodagi eng bebaho boylik – aql-zakovat va ilm, o‘lmas meros – yaxshi tarbiyadir. Sizlar esa dunyodagi eng bebaho boylik va boqiy merosni yaratish, uni xalqimizga, favqulodda vaziyatlar vazirligining yangi avlodiga yetkazish yo‘lida chinakam fidoyilik ko‘rsatib mehnat qilayotgan ulug‘ insonlarsiz!

Bugun Yangi O‘zbekiston va Uchinchi Renessans poydevorini barpo etish davrida Muhtaram Prezidentimiz tomonlaridan ustozlarning mashaqqatli mehnatini qadrlash, ularga zarur shart-sharoitlar yaratish, ijtimoiy qo‘llab-quvvatlashga yuksak e’tibor bilan qaralmoqda.

Chunki, ustozini, muallimini e’zozlagan jamiyat albatta ravnaq topadi, gullab-yashnaydi. O‘qituvchisining qadr-qimmati baland bo‘lgan xalqning obro‘-e’tibori yuksak bo‘ladi, – deya ta’kidlagan edi Hurmatli Prezidentimiz.

So‘ngi yillarda vazirlik tizimida ulkan islohotlar, xalqimiz tinchligi va farovonligini ta’minlash borasida ulkan yutuqlar qo‘lga kiritilmoqda. Bunday natijalarga erishishda o‘z burchiga, Vataniga sadoqatli, xalq, jamiyat hamda davlat manfaatlari yo‘lida sidqidildan xizmat qilib kelayotgan Siz kabi fidoyi insonlarning munosib hissangiz borligini alohida qayd etish joiz.

Favqulodda vaziyatlar vazirligi tizimida yosh avlodni ona - Vatanga muhabbat, xizmat burchiga sadoqat ruhida tarbiyalash, sohaga oid bilimlarni yanada oshirishda ko‘makdosh bo‘layotgan yuqori tajribali harbiy xizmatchilar, professor-o‘qituvchilar, xizmatchi xodimlar va faxriylarimizga doimo hurmat va ehtirom ko‘rsatamiz.

Fursatdan foydalanib, barchangizni ushbu bayram munosabati bilan  yana bir bor qizg‘in qutlagan holda, g‘oyat mas’uliyatli va sharafli xizmatingizda ulkan zafarlar, mustahkam salomatlik, baxt-saodat, uzoq umr, oilaviy totuvlik, dasturxoningizga to‘kinlik va qut-baraka tilayman.  

Hurmat bilan,

Vazir

    general-mayor B. Kudratxodjayev