O‘zbеkistоn Rеspublikаsi Favqulodda vaziyatlar vazirligi

Keyingi yillarda mamlakatimiz mudofaa salohiyatini mustahkamlash, Qurolli Kuchlarni professional tuzilmaga aylantirish, harbiy xizmat nufuzini oshirish, yoshlarni vatanparvarlik ruhida tarbiyalash borasida tizimli ishlar olib borilmoqda.

Shu bilan birga, yurtimizda yoshi ulug‘ insonlarga, ayniqsa, mamlakatimiz barqarorligi va tinchligi yo‘lida xizmat qilgan harbiylarga, ularning oilalariga e’tibor va g‘amxo‘rlik ko‘rsatish davlat siyosatining ustuvor yo‘nalishlaridan biriga aylandi.

Tadbirda qayd etilganidek, Xotira va qadrlash kuni — xalqimizning asrlar davomida shakllangan ezgu qadriyatlari, milliy o‘zligimiz, tinchlik va ozodlik uchun kurashgan ajdodlarimizning jasoratini yod etish va qadrlash kunidir. Ushbu sana har bir yurtdoshimiz uchun alohida ahamiyatga ega bo‘lib, Vatan ozodligi va mustaqilligi yo‘lida jonini fido qilgan qahramonlarimizni yodga olish, ularning xotirasini abadiylashtirish, qahramonliklarini yosh avlod ongiga singdirish imkonini beradi.

Tadbir davomida mudofaa va xavfsizlik sohasidagi islohotlar, sohaga oid qonunchilikni takomillashtirish, parlament nazoratini olib borish yuzasidan amalga oshirilgan ishlar, kelgusidagi vazifalar bo‘yicha fikrlar va takliflar bildirildi. Harbiy xizmatchilar hamda faxriylarni ijtimoiy qo‘llab-quvvatlash borasida amalga oshirilayotgan ishlar to‘g‘risida ham ma’lumotlar taqdim etildi.

O‘z navbatida, ishtirokchilar ushbu tadbir mamlakatimizda harbiy soha faxriylariga ko‘rsatilayotgan yuksak ehtirom ifodasi bo‘lib, ularning boy tajribasini o‘rganish va yosh avlodga yetkazish, shuningdek, mudofaa, xavfsizlik sohasidagi islohotlarni amalga oshirishda faxriylarning fikr-mulohazalarini inobatga olish maqsadida tashkil etilgani bilan ham ahamiyatli ekanini ta’kidladilar.

Faxriylarning hayotiy tajribasi va bilimlaridan qonun ijodkorligi jarayonida foydalanish — quyi palata faoliyatining muhim yo‘nalishlaridan biri bo‘lib qolishi alohida qayd etib o‘tildi.

Tadbir doirasida harbiy faxriylar Qonunchilik palatasi muzeyi, katta majlislar zali, kutubxona va axborot resurs markazi bilan tanishdilar.