Ona diyorimizga barchamiz orziqib kutgan go‘zal va dilbar, yangilanish fasli – Navro‘zi olam kirib keldi. 

Mana shunday qutlug‘ kunda Siz azizlarga mustahkam sihat-salomatlik, baxt va omad, oilangizga tinchlik-xotirjamlik, fayzu baraka tilagan holda ana shu ulug‘ ayyom bilan barchangizni chin qalbdan samimiy muborakbod etaman. 

Yurtimiz ahli bu yil ham Navro‘z bayramini Yaratganga shukronalar aytib, Respublikamizning barcha jabhalarida shodu xurramlik bilan keng tarzda nishonlamoqdalar.

O‘zaro mehr-oqibat, saxovat va muruvvat ko‘rsatish, tabarruk keksalarimizni yo‘qlash, nogironlar, yordamga muhtoj insonlar holidan xabar olish, hasharlar o‘tkazib, yurtimizni yanada obod qilish kabi savobli ishlarimiz Navro‘zning fayziga yanada fayz qo‘shmoqda. 

Favqulodda vaziyatlar vazirligi tizimi harbiy xizmatchi va xizmatchilari ushbu ayyom tadbirlarida har doimgidek ogoh va hushyor turib, yurtimiz aholisi hamda hududlarini favqulodda vaziyatlardan muhofaza qilishdek sharafli vazifalarini fidoyilik bilan ado etmoqdalar.

Hurmatli hamkasblar !

Bugun fidoyi dehqon va fermerlarimiz katta orzu-umid bilan yangi mavsumni boshlamoqdalar. Barchamiz ularni chin dildan tabriklab, yilimiz qutlug‘ kelsin, hosilimiz mo‘l bo‘lsin, deb eng ezgu tilaklarimizni bildiramiz.

Istagimiz shuki, Navro‘zi olam yurtimizga tinchlik-omonlik, qut-baraka olib kelsin!

Har bir oila, har bir xonadonda yaxshi kunlar ko‘p bo‘lsin!

Osmonimiz musaffo, yurtimiz tinch, xalqimiz omon bo‘lsin!

Navro‘z bayrami yana bir bor muborak bo‘lsin! 

              Hurmat bilan,

                     Vazir

general-mayor  B. Kudratxodjayev