Bugun, 9-oktabr kuni Favqulodda vaziyatlar vazirligi Markaziy apparati binosida vazirlik mutaxassislari bilan Germaniya Ichki ishlar vazirligi Jamoat xavfsizligi va tartibni saqlash boshqarmasi boshlig‘i Shteffen Anton Xaag boshchiligidagi delegatsiya o‘rtasida uchrashuv bo‘lib o‘tdi.

Germaniyalik hamkasblarning tashrifidan maqsad, O‘zbekiston Respublikasi Favqulodda vaziyatlar vazirligi faoliyati bilan yaqindan tanishish, yong‘in va boshqa turdagi favqulodda vaziyatlarning oldini olish, shuningdek, oqibatlarini bartaraf etish bo‘yicha tajriba almashishdan iborat bo‘ldi. Muloqot chog‘ida Favqulodda vaziyatlar vazirining birinchi o‘rinbosari S.T.Zuparov mamlakatimizda aholi va hududlarni tabiiy va texnogen ofatlardan himoya qilish qay tartibda olib borilayotganligi to‘g‘risida so‘z yuritdi. O‘z navbatida, Shteffen Anton Xaag bu boradagi Germaniya tajribasi bilan o‘rtoqlashdi. Muloqotda hamkorlikni mustahkamlash va ikki davlat qutqaruv xizmatlari faoliyati samaradorligini oshirish ta’kidlab o‘tildi. Tadbir so‘ngida Germaniyadan tashrif buyurgan mehmonlar Parijdagi Olimpiadada O‘zbekiston terma jamoasi tomonidan erishilgan yuqori natijalarini qayd etib o‘tdi.