Favqulodda vaziyatlar vazirining birinchi o‘rinbosari polkovnik S.T.Zuparov rahbarligida Buxoro viloyatida hamkorlikdagi qo‘mondonlik-shtab o‘quv mashqlari o‘tkazilmoqda
2026-10-28 20:50:00 / Yangiliklar
Mashqlarda bir nechta o‘quv nuqtalarida shartli favqulodda vaziyatlar yuzaga kelganda fuqaro muhofazasiga mas’ul tashkilotlar va tegishli xizmatlarning amaliy harakatlari sinovdan o‘tkazilmoqda. Bunda favqulodda vaziyatlarning oldini olish, ularning oqibatlarini tezkor bartaraf etish hamda aholi xavfsizligini ta’minlashga qaratilgan chora-tadbirlarning samaradorligiga alohida e’tibor qaratilmoqda.
O‘quv mashqlari doirasida tezkor xizmatlar tomonidan aholini xavfsiz hududlarga evakuatsiya qilish, jabrlanganlarga birinchi tibbiy yordam ko‘rsatish, yong‘inlarni o‘chirish, qutqaruv ishlarini amalga oshirish hamda shartli favqulodda vaziyat oqibatlarini bartaraf etish bo‘yicha amaliy harakatlar bajarilmoqda.
Shuningdek, mas’ul idora va tashkilotlarning o‘zaro hamkorligi, kuch va vositalarning shayligi, boshqaruv organlarining tezkor qaror qabul qilish qobiliyati hamda belgilangan vazifalarni muvofiqlashtirilgan holda bajarishi baholanmoqda.
Mazkur mashqlardan ko‘zlangan asosiy maqsad — favqulodda vaziyatlarda boshqaruv samaradorligini oshirish, tegishli xizmatlarning hamkorligini mustahkamlash, qutqaruv kuchlarining amaliy tayyorgarligini yuksaltirish hamda aholi hayoti va xavfsizligini ishonchli himoya qilishdan iborat.