O‘zbekiston Respublikasi Favqulodda vaziyatlar vaziri Azizbek Ikramov boshchiligidagi delegatsiya ikki mamlakat qutqaruv idoralari o‘rtasida tajriba almashish maqsadida Belarus Respublikasiga tashrifini davom ettirmoqda
2026-10-24 11:40:00 / Yangiliklar
Jumladan, Belarus Respublikasi FVV rahbari Vadim Sinyavskiy hamrohligida A. Ikramov FVV universitetining tezkor-taktik poligoni va sinovlar markazi faoliyatini o‘rgandi. Mazkur markaz mutaxassislari har yili mingdan ortiq sinov va tadqiqot ishlarini amalga oshiradi. Ushbu ishlar yong‘in o‘chirish vositalarini tekshirishdan tortib, zamonaviy muhandislik tizimlarini baholashgacha bo‘lgan keng qamrovli xavfsizlik masalalarini o‘z ichiga oladi.
Tashrif davomida mehmonlarga qutqaruvchilarning himoya kiyimlari va maxsus anjomlarining olovbardoshlik xususiyatlarini sinovdan o‘tkazish jarayoni namoyish etildi.
Shundan so‘ng delegatsiya ixtisoslashtirilgan poligon, zamonaviy o‘quv auditoriyalari hamda qutqaruvchilarni, shuningdek, Belarus va xorijiy davlatlardan kelgan boshqa soha mutaxassislarini tayyorlashda foydalaniladigan texnik jihozlar bilan tanishdi.
Kunning ikkinchi yarmida O‘zbekiston delegatsiyasi “POJSNAB” idorasiga qarashli korxonada ishlab chiqarilayotgan maxsus texnikalar namunalarini ko‘zdan kechirdi. Mazkur korxonada yong‘in o‘chirish avtosisternalari, avtonarvonlar va bugungi kunda Belarus Respublikasi qutqaruv bo‘linmalari xizmatida foydalanilayotgan boshqa turdagi maxsus texnikalar ishlab chiqariladi.