Favqulodda vaziyatlar vaziri Azizbek Ikramov Belarus Respublikasiga tashrif doirasida belaruslik hamkasbi Vadim Sinyavskiy bilan uchrashdi
2026-10-23 17:05:00 / Yangiliklar
Muzokaralar davomida vazir Azizbek Ikramov hamkorlikni bir qator yo‘nalishlarda yanada rivojlantirishni taklif etdi. Jumladan, qo‘shma ilmiy-tadqiqot va tajriba-konstruktorlik ishlarini olib borish, ilmiy-texnik axborot va ilg‘or texnologiyalar almashinuvini yo‘lga qo‘yish, yong‘in-texnik mahsulotlar hamda qutqaruv uskunalarini ishlab chiqarish va sertifikatlash sohasida hamkorlikni rivojlantirish, shuningdek, ixtisoslashtirilgan xizmatlar o‘rtasidagi aloqalarni mustahkamlash masalalariga alohida e’tibor qaratildi.
Tashrif doirasida O‘zbekiston Respublikasi Favqulodda vaziyatlar vazirligi delegatsiyasi Belarus Respublikasining favqulodda vaziyatlarni boshqarish va ularga javob qaytarish markazi faoliyati bilan ham tanishdi. Delegatsiya a’zolariga markazning favqulodda vaziyatlar yuzaga kelganda tegishli organlar va xizmatlar faoliyatini muvofiqlashtirish, tezkor axborotlarni yig‘ish va tahlil qilish, shuningdek, manfaatdor tuzilmalar o‘rtasida ma’lumot almashinuvini tashkil etishdagi o‘rni haqida ma’lumot berildi.
Shuningdek, mehmonlar markazning vaziyatni monitoring qilish hamda favqulodda vaziyatlarga javob qaytarish jarayonida qarorlar qabul qilinishini qo‘llab-quvvatlash borasidagi faoliyati bilan yaqindan tanishdilar. Tashrif ishtirokchilari ushbu yo‘nalishdagi ishlarni tashkil etishning amaliy jihatlarini muhokama qilib, o‘zaro tajriba almashdilar.
O‘zbekiston Respublikasi Favqulodda vaziyatlar vazirligi delegatsiyasining Belarus Respublikasiga tashrifi davom etmoqda.