O‘zbеkistоn Rеspublikаsi Favqulodda vaziyatlar vazirligi

Bugun, 19-oktyabr kuni O‘zbekiston poytaxtida yuqori darajadagi Mintaqaviy forum doirasida panel sessiyalari bo‘lib o‘tmoqda. Ularda Markaziy Osiyo mamlakatlari, shuningdek, qator nufuzli xalqaro tashkilotlar ekspertlari favqulodda vaziyatlarning oldini olish, ular yuzaga kelgan taqdirda o‘z vaqtida javob choralarini ko‘rish hamda Markaziy Osiyo davlatlari favqulodda vaziyatlar idoralari o‘rtasidagi hamkorlikni rivojlantirish masalalarini muhokama qilmoqda.

Kun tartibidan uchta asosiy yo‘nalish o‘rin olgan. Xususan,

- shaharlarning ofatlar xavfi va iqlim o‘zgarishiga nisbatan barqarorligini oshirish hamda seysmik xavfsizlik masalalari bo‘yicha mintaqaviy muloqot;

- Markaziy Osiyoda transchegaraviy suv resurslarini xavfsiz boshqarish salohiyatini kuchaytirish, shuningdek, transchegaraviy xususiyatga ega sel va suv toshqinlari oqibatlarini yumshatish masalalari bo‘yicha mintaqaviy muloqot;

Yirik ko‘lamli va transchegaraviy xususiyatga ega favqulodda vaziyatlarga xalqaro javob qaytarishning mintaqaviy mexanizmlarini takomillashtirish masalalari bo‘yicha mintaqaviy muloqot.

Panel sessiyalari davomida O‘zbekiston, Qozog‘iston, Tojikiston, Qirg‘iziston va Turkmaniston ekspertlarining qator ma’ruzalari tinglandi. O‘zbekiston Respublikasi Favqulodda vaziyatlar vazirligi ekspertlari ham muhim tashabbuslarni ilgari surdilar.

Forumning asosiy hamkorlari sifatida Birlashgan Millatlar Tashkilotining Taraqqiyot dasturi (BMTTD), Birlashgan Millatlar Tashkiloti (BMT), Germaniya xalqaro hamkorlik jamiyati (GIZ) hamda Favqulodda vaziyatlar va ofatlar xavfini kamaytirish markazi (CESDRR) ishtirok etmoqda.

Bugungi muhokamalar yakunlari bo‘yicha mintaqa ekspertlari qator muhim hujjatlarni ishlab chiqish masalalarini ko‘rib chiqadilar. Ushbu hujjatlar kelgusida aholi va hududlarni favqulodda vaziyatlardan muhofaza qilish sohasida yangi transchegaraviy loyihalarni amalga oshirish uchun asos bo‘lib xizmat qiladi.

Eslatib o‘tamiz, ertaga, 20-oktyabr kuni “Hilton” mehmonxonasida Markaziy Osiyo mamlakatlari favqulodda vaziyatlar idoralari rahbarlarining Mintaqaviy forumi-kengashining rasmiy ochilish marosimi bo‘lib o‘tadi.