Favqulodda vaziyatlar vaziri Samarqand viloyatida o‘rganish ishlarini olib bordi
2026-10-18 16:30:00 / Yangiliklar
Favqulodda vaziyatlar vaziri general-mayor Azizbek Ikramov Samarqand viloyatida bo‘lib, hududda favqulodda vaziyatlarning oldini olish, ularni bartaraf etish, qutqaruv tuzilmalari faoliyatini takomillashtirish hamda shaxsiy tarkib uchun yaratilgan shart-sharoitlar bilan yaqindan tanishdi.
Dastlab vazir Samarqand viloyati Favqulodda vaziyatlar boshqarmasi hamda Favqulodda vaziyatlar vazirligi Akademiyasi huzuridagi Malaka oshirish markazi shaxsiy tarkibi bilan ochiq muloqot o‘tkazdi. Muloqot davomida sohada amalga oshirilayotgan ishlar, xizmat faoliyati samaradorligini oshirish, xodimlarning kasbiy mahorati va bilimlarini muntazam ravishda takomillashtirish, shuningdek, xizmat intizomiga qat’iy rioya etish masalalariga e’tibor qaratildi.
Shundan so‘ng vazir hududdagi bir qator qutqaruv qismlarida bo‘lib, ularning kundalik faoliyati, moddiy-texnik ta’minoti, mavjud texnika va asbob-uskunalarning holati, shuningdek, qutqaruvchilarning samarali xizmat olib borishi uchun yaratilgan shart-sharoitlarni o‘rgandi.
Shuningdek, yangi barpo etilayotgan qutqaruv qismlaridan birida olib borilayotgan qurilish-bunyodkorlik ishlari bilan tanishib, obyektning belgilangan talablar asosida barpo etilishi, ishlarning sifatli va o‘z vaqtida yakunlanishi hamda kelgusida xodimlar uchun zarur sharoitlarni yaratish masalalariga alohida e’tibor qaratdi.
Vazir Malaka oshirish markazida ham bo‘lib, ta’lim jarayonining tashkil etilishi, o‘quv xonalari va mavjud infratuzilma, tinglovchilar uchun yaratilgan sharoitlar bilan tanishdi. Xodimlarning kasbiy tayyorgarligini oshirish, zamonaviy yondashuvlar asosida o‘quv mashg‘ulotlarini tashkil etish va ta’lim sifatini yanada yaxshilash yuzasidan fikr-mulohazalar bildirildi.
O‘rganishlar yakunida mas’ul rahbarlarga aniqlangan masalalarni bartaraf etish, mavjud imkoniyatlardan samarali foydalanish, shaxsiy tarkib uchun munosib xizmat sharoitlarini yaratish hamda belgilangan vazifalar ijrosini ta’minlash bo‘yicha tegishli ko‘rsatma va tavsiyalar berildi.