O‘zbekiston FVV delegatsiyasi vazir Azizbek Ikrаmov boshchiligida Jahon qutqaruv va himoya kongressidagi ishtirokini davom ettirmoqda
2026-10-02 22:40:00 / Yangiliklar
Fransiyaning La-Rosh-syur-Foron shahrida bo‘lib o‘tayotgan Jahon qutqaruv va himoya kongressining navbatdagi kuni mahalliy qutqaruv xizmati tomonidan tashkil etilgan xalqaro seminar bilan boshlandi. Tadbir davomida yong‘inlarni o‘chirish sohasidagi zamonaviy ishlanmalar va texnologiyalar, shuningdek, murakkab sharoitlarda insonlarni qutqarish usullari namoyish etildi.
Shundan so‘ng forum doirasida O‘zbekiston FVV vaziri Azizbek Ikrаmov mazkur soha yoʻnalishidagi xalqaro tashkilotlar rahbarlari bilan qator uchrashuvlar o‘tkazdi.
Xususan, vazir AFoCO xalqaro tuzilmasining siyosat bo‘limi direktori Sungjin Lin bilan uchrashdi. Uchrashuvda o‘rmon yong‘inlarining oldini olish va ularni bartaraf etishning zamonaviy usullari, shuningdek, ushbu jarayonlarga sun’iy intellekt texnologiyalarini joriy etish masalalari muhokama qilindi.
Shuningdek, FVV rahbari Fuqaro mudofaasi xalqaro tashkiloti Bosh kotibi Arguj Kalantarli bilan ham samarali muzokaralar o‘tkazdi.
Tashrif doirasida O‘zbekiston FVV delegatsiyasi Ansi shahridagi qutqaruv qismlaridan birining faoliyati bilan ham tanishdi. Mehmonlar uchun ekskursiya tashkil etilib, fransuz qutqaruvchilarining ishlash usullari amaliy tarzda namoyish etildi. Tadbir davomida ikki mamlakat qutqaruvchilari o‘rtasida tajriba almashinuvi ham bo‘lib o‘tdi.
Kongress doirasida ertaga ham qator muhim tadbirlar o‘tkazilishi kutilmoqda.