Favqulodda vaziyatlar vaziri Azizbek Ikramov Fransiyada bo‘lib o‘tayotgan Butunjahon qutqaruv va himoya kongressi doirasida bir qator uchrashuvlar o‘tkazdi
2026-10-01 23:40:00 / Yangiliklar
Eslatib o‘tamiz, 29 sentyabr - 3 oktyabr kunlari vazir Azizbek Ikramov boshchiligidagi O‘zbekiston FVV delegatsiyasi Fransiyada bo‘lib o‘tayotgan Butunjahon qutqaruv va himoya kongressida ishtirok etmoqda. Ansi shahrida bo‘lib o‘tayotgan forumning navbatdagi kunida Favqulodda vaziyatlar vaziri A.Ikramov dunyoga mashhur "Airbus" kompaniyasi rahbariyati bilan uchrashuv o‘tkazdi. Tomonlar qidiruv-qutqaruv operatsiyalarida zamonaviy aviatsiya texnikasini qo‘llash sohasidagi hamkorlik istiqbollarini muhokama qildilar.
Shuningdek, kongress doirasida vazir Fransiya Ichki ishlar vazirligining Fuqarolik xavfsizligi va inqirozlarni boshqarish bosh boshqarmasi bosh direktori Julien Marion bilan muzokaralar o‘tkazdi. Uchrashuvda O‘zbekiston va Fransiya qutqaruv idoralari o‘rtasida aholi va hududlarni favqulodda vaziyatlardan himoya qilish sohasidagi hamkorlikni kengaytirish zarurligi ta’kidlandi.Jarayonning eng muhim tarkibiy qismlaridan biri qo‘shma seminarlar va treninglar o‘tkazish orqali ekspertlar o‘rtasida amaliy tajriba almashishdir.
Bundan tashqari, O‘zbekiston delegatsiyasi tog‘-qutqaruv brigadasining moddiy-texnik bazasi, uning murakkab tog‘ sharoitida qutqaruv ishlarini qanday amalga oshirishi va boshqalar bilan tanishdi.