Muhtaram ustozlar, aziz faxriylar!

Siz azizlarni 1-oktyabr – O‘qituvchi va murabbiylar kuni munosabati bilan chin qalbimdan samimiy muborakbod etaman!

Ustoz degan sharafli nom har bir inson hayotida alohida o‘rin tutadi. Zero, dunyodagi eng bebaho boylik – ilm va tafakkur, eng buyuk meros esa go‘zal tarbiyadir. Sizlar ana shu bebaho boylikni yaratib, uni xalqimizga, xususan, Favqulodda vaziyatlar vazirligi tizimining yangi avlodiga yetkazish yo‘lida fidokorona mehnat qilmoqdasiz.

Bugun Yangi O‘zbekistonni barpo etish va Uchinchi Renessans poydevorini yaratish jarayonida muhtaram Prezidentimiz rahnamoligida ta’lim tizimini rivojlantirish, ustoz va murabbiylarning jamiyatdagi nufuzi hamda qadr-qimmatini yuksaltirish, ularni har tomonlama qo‘llab-quvvatlashga alohida e’tibor qaratilmoqda.

Darhaqiqat, ustoz va muallimlari qadrlangan jamiyat taraqqiy etadi. O‘qituvchining obro‘-e’tibori yuksak bo‘lgan yurtda bilimli, vatanparvar va fidoyi avlod kamol topadi.

So‘nggi yillarda Favqulodda vaziyatlar vazirligi tizimida amalga oshirilayotgan keng ko‘lamli islohotlar, xalqimiz hayoti va osoyishtaligini ishonchli himoya qilish borasida erishilayotgan natijalarda ustoz va murabbiylarning ham munosib hissasi bor.

Ayniqsa, yosh harbiy xizmatchi va xodimlarni Vatanga muhabbat, kasbga sadoqat, yuksak mas’uliyat va jasorat ruhida tarbiyalash, ularning bilim hamda kasbiy mahoratini oshirish yo‘lida samarali mehnat qilayotgan professor-o‘qituvchilarimiz, tajribali harbiy xizmatchilarimiz, xodimlarimiz va faxriylarimizning xizmatlarini yuksak qadrlaymiz.

Ishonchim komilki, sizlarning boy bilim va tajribangiz, fidokorona mehnatingiz bundan buyon ham vazirlik tizimi uchun zamonaviy bilim va ko‘nikmalarga ega, mard, jasur hamda Vatanga sadoqatli kadrlarni tayyorlashga xizmat qiladi.

Fursatdan foydalanib, barchangizni ushbu qutlug‘ bayram bilan yana bir bor samimiy tabriklayman! Sizlarga mustahkam sog‘liq, uzoq umr, oilaviy baxt-saodat va xonadonlaringizga fayzu baraka, mas’uliyatli hamda sharafli faoliyatingizda ulkan muvaffaqiyatlar tilayman!

Hurmat bilan,

O‘zbekiston Respublikasi Favqulodda vaziyatlar vaziri

general-mayor Azizbek Isroilovich Ikromov