Qashqadaryo viloyatida favqulodda vaziyatlar tizimi uchun yangi imkoniyatlar yaratildi
2026-08-29 22:40:00 / Yangiliklar
Favqulodda vaziyatlar vaziri general-mayor Azizbek Ikramov boshchiligida Vatanimiz mustaqilligining 35 yilligi arafasida Qashqadaryo viloyatida Favqulodda vaziyatlar vazirligi tizimi uchun bir qator yangi obyektlar va xizmat avtomobillari foydalanishga topshirildi.
Jumladan, Yakkabog‘ tumanidagi 22-qutqaruv qismi, Shahrisabz tumanidagi 21-qutqaruv qismining binolari hamda Hayot faoliyati xavfsizligini o‘qitish markazi yangidan qurib bitkazildi va zamonaviy shart-sharoitlar hamda zarur o‘quv-mashg‘ulot vositalari bilan ta’minlandi. Shuningdek, viloyat FVB bo‘linmalariga yangi zamonaviy xizmat avtomobillari tantanali ravishda topshirildi.
Yaratilgan ushbu imkoniyatlar qutqaruvchilarning xizmat faoliyatini yanada samarali tashkil etish, favqulodda vaziyatlarga tezkor javob berish hamda aholi xavfsizligini ishonchli ta’minlashga xizmat qiladi.
Tadbirlar davomida xizmat vazifalarini munosib ado etib kelayotgan bir guruh xodimlar esdalik nishonlari va tashakkurnomalar bilan taqdirlandi.