Rossiya Federatsiyasi Tatariston Respublikasi Nijnekamsk shahrida sodir bo‘lgan hodisa yuzasidan MA’LUMOT
2026-08-10 20:45:00 / Yangiliklar
2026-yil 10-avgust kuni tongda Rossiya Federatsiyasi Tatariston Respublikasi Nijnekamsk shahrida joylashgan bir qator obyektlarga uchuvchisiz uchish apparatlari (dron) orqali hujum sodir bo‘ldi.
Dastlabki ma’lumotlarga ko‘ra, ushbu hodisa oqibatida Nijnekamsk shahri hududida faoliyat yuritgan qurilish korxonasida quruvchi bo‘lib ishlagan jami 8 nafar O‘zbekiston Respublikasi fuqarolari halok bo‘lgan hamda bir nechta fuqarolarimiz turli darajadagi tan jarohatlari bilan shifoxonaga joylashtirilgan.
O‘zbekiston Respublikasi Prezidenti Sh.M. Mirziyoyevning topshiriqlariga muvofiq, O‘zbekiston Respublikasi Bosh vazirining o‘rinbosari O. Ramatov boshchiligida mas’ul vazirlik va idoralar vakillaridan iborat Hukumat komissiyasini tashkil etish bo‘yicha Vazirlar Mahkamasining farmoyishi qabul qilindi.
Unga ko‘ra, Hukumat komissiyasiga hodisa oqibatida jabrlangan fuqarolarimizning holidan xabar olish va ularga barcha zarur yordam ko‘rsatish, halok bo‘lgan O‘zbekiston Respublikasi fuqarolarini havo transportida maxsus reys orqali olib kelish va tegishli manzillarga yetkazish, shuningdek, ularning oila a’zolariga har tomonlama ko‘maklashish vazifalari yuklatildi.
Shuningdek, farmoyishga muvofiq Favqulodda vaziyatlar vazirligi, Tashqi ishlar vazirligi, Sog‘liqni saqlash vazirligi, Migratsiya agentligi va boshqa mutasaddi tashkilotlar vakillaridan iborat Maxsus ishchi guruh Rossiya Federatsiyasiga yuborilib, barcha zarur chora-tadbirlar amalga oshirilmoqda.
Shuni alohida ta’kidlash joizki, hozirda hodisa joyiga O‘zbekiston Respublikasining Qozon shahridagi Bosh konsulxonasi va Migratsiya agentligi vakillari yetib borib, rossiyalik hamkasblari bilan doimiy aloqada bo‘lgan holda, hamkorlikda tezkor chora-tadbirlarni ko‘rmoqda.
Jabrlangan O‘zbekiston Respublikasi fuqarolari to‘g‘risida tezkor ma’lumot olish uchun:
O‘zbekiston Respublikasining Qozon shahridagi Bosh konsulining +79656007979 telefon raqamiga;
Migratsiya agentligining Rossiya Federatsiyasidagi vakolatxonasining +79257508757, +79251270002 telefon raqamlariga murojaat qilish mumkin.