O‘zbеkistоn Rеspublikаsi Favqulodda vaziyatlar vazirligi

“Oʻzbekiston Respublikasi favqulodda vaziyatlar organlari faoliyatini takomillashtirishda yangi qonunchilik islohotlari” mavzusida davra suhbati boʻlib oʻtdi. 

Davra suhbatida Inson huquqlari boʻyicha Oʻzbekiston Respublikasi Milliy markazi direktorining birinchi oʻrinbosari, yuridik fanlar doktori (DSc) Mirzatillo Tillabayev, Jamoat xavfsizligi universiteti Jinoyat xavfsizligini taʼminlash kafedrasi professori, yuridik fanlar doktori (DSc), professor Gʻaybulla Alimov, Qonun loyihasini ishlab chiqishda bevosita ishtirok etgan soha mutaxassislari va huquqshunos olimlar, Akademiya professor-oʻqituvchilari, harbiy xizmatchilar hamda ommaviy axborot vositalari vakillari ishtirok etdilar.

Davra suhbatini Oʻzbekiston Respublikasi Favqulodda vaziyatlar vazirligi Akademiyasi boshligʻi, yuridik fanlari doktori, professor, polkovnik Muzaffarjon Mamasiddiqov ochib berdi. U oʻz nutqida mamlakatimizda favqulodda vaziyatlar sohasini tubdan takomillashtirish borasida amalga oshirilayotgan izchil islohotlar, mazkur Qonun loyihasining dolzarbligi hamda uning Favqulodda vaziyatlar organlari faoliyatining zamonaviy va samarali huquqiy asoslarini yaratishdagi oʻrni haqida batafsil toʻxtaldi.

Muhokamalar davomida Qonun loyihasida nazarda tutilgan asosiy yangiliklar, Favqulodda vaziyatlar organlari faoliyatining tashkiliy-huquqiy asoslarini takomillashtirish, zamonaviy boshqaruv mexanizmlarini joriy etish, favqulodda vaziyatlarning oldini olish va oqibatlarini bartaraf etish tizimini yanada rivojlantirish, shuningdek, sohada davlat boshqaruvi samaradorligini oshirishga qaratilgan huquqiy normalar yuzasidan atroflicha fikr almashildi.

Tadbirda soʻzga chiqqan, yuridik fanlar doktori (DSc) Mirzatillo Tillabayev, yuridik fanlar doktori (DSc), professor Gʻaybulla Alimov, bi qator mutaxassis va olimlar tomonidan Qonun loyihasida nazarda tutilgan normalarning amaliy ahamiyati, ularni samarali amalga oshirishning huquqiy va tashkiliy mexanizmlari, ilgʻor xorijiy tajribani milliy qonunchilikka uygʻunlashtirish hamda Favqulodda vaziyatlar organlari faoliyatini yanada takomillashtirish yuzasidan ilmiy-amaliy taklif va tavsiyalar bildirildi.
Davra suhbati yakunida bildirilgan taklif va mulohazalar Qonun loyihasini yanada takomillashtirish, Favqulodda vaziyatlar organlari faoliyatining huquqiy asoslarini mustahkamlash hamda sohada amalga oshirilayotgan islohotlar samaradorligini oshirishga xizmat qilishi alohida taʼkidlandi.