Favqulodda vaziyatlar vaziri general-mayor Azizbek Ikramov Buxoro yoshlari bilan uchrashdi
2026-07-16 18:20:00 / Yangiliklar
Buxoro davlat pedagogika institutida tashkil etilgan tadbirda Buxoro viloyati hokimi B.K.Zaripov, tizim faxriylari, Favqulodda vaziyatlar tizimida xizmat qilayotgan yoshlar hamda otaliqqa olingan va uyushgan yoshlar ishtirok etdi.
Muloqot jarayonida vazir o‘zining xizmat faoliyati, hayotiy boy tajribasi hamda bosib o‘tgan yo‘li haqida so‘zlab berdi. Shuningdek, u qutqaruvchilik kasbi nafaqat mas’uliyatli, balki inson hayotini saqlab qolishga xizmat qiladigan sharafli va fidokorona kasb ekanini alohida ta’kidladi.
Tadbir davomida yoshlar o‘zlarini qiziqtirgan turli savollar bilan murojaat qilib, vazirdan batafsil va hayotiy javoblar oldilar. Suhbat samimiy ruhda o‘tib, yoshlarda katta taassurot qoldirdi. Ayniqsa, vazirning hayotiy tajribasi yoshlarni ruhlantirdi.
Tadbirning ikkinchi qismida vazir yosh startap tashabbuskorlari tomonidan taqdim etilgan innovatsion loyihalar bilan tanishdi. Loyihalarning mazmun-mohiyati, amaliy ahamiyati va istiqbollari yuzasidan fikr almashilib, ularni qo‘llab-quvvatlash hamda amaliyotga joriy etish bo‘yicha tavsiyalar berildi.