O‘zbekiston FVV ishchi guruhining navbatdagi manzili Fransiyaning Annesi shahrida joylashgan Fransiya Fuqaro xavfsizligi qutqaruv xizmatining tog‘-qutqaruv bo‘linmasi bo‘ldi
2026-06-19 17:30:00 / Yangiliklar
Joriy yilning 18-iyun kuni O‘zbekiston Respublikasi Favqulodda vaziyatlar vazirligi ishchi guruhi Fransiyaning Annesi shahrida joylashgan Fransiya Fuqaro xavfsizligi qutqaruv xizmatining tog‘-qutqaruv bo‘linmasi faoliyati bilan yaqindan tanishdi.
Tashrif davomida mutaxassislarga bo‘linmaning faoliyati, qidiruv-qutqaruv ishlarini tashkil etish tartibi hamda tog‘li hududlarda qo‘llanilayotgan zamonaviy qutqaruv usullari haqida batafsil ma’lumot berildi. Shuningdek, bo‘linma tasarrufidagi Airbus H145 rusumli vertolyotlarning texnik va amaliy imkoniyatlari namoyish etildi.
Shundan so‘ng Yevropaning eng baland cho‘qqilaridan biri hisoblangan Mont Blanc hududiga, dengiz sathidan qariyb 4 800 metr balandlikka parvoz amalga oshirildi. Parvoz davomida vertolyot ekipaji tog‘da qolib ketgan va yordamga muhtoj alpinistlarni aniqlash, ularga tezkor yetib borish hamda xavfsiz hududga evakuatsiya qilish jarayonlarini amaliy tarzda namoyish etdi.
Jumladan, yuqori tog‘ sharoitida vertolyotning havoda belgilangan nuqtada barqaror holatda turishi, qutqaruvchilarni murakkab va yetib borish qiyin bo‘lgan hududlarga tushirish, shuningdek, jabrlanganlarni maxsus qutqaruv uskunalari yordamida evakuatsiya qilish imkoniyatlari ko‘rsatib berildi.
Tashrif yakunida ishchi guruh a’zolari tog‘li hududlarda qidiruv-qutqaruv ishlarini samarali tashkil etishda aviatsiya vositalaridan foydalanish bo‘yicha Fransiya tajribasi hamda Airbus H145 vertolyotlarining amaliy imkoniyatlari bilan yaqindan tanishdilar.