Favqulodda vaziyatlarda to‘g‘ri harakat qilishga o‘rgatuvchi targ‘ibot materiallari tarqatilmoqda
2026-06-18 09:30:00 / Yangiliklar
Favqulodda vaziyatlar vazirining 2026-yil 24-fevraldagi 44-son buyrug‘i ijrosini ta’minlash maqsadida, joriy yilning 17-iyun kuni Samarqand viloyatidagi Samarqand davlat veterinariya meditsinasi, chorvachilik va biotexnologiyalar universiteti hamda "Ipak yo‘li" turizm va madaniy meros xalqaro universitetida seminar tashkil etildi.
Seminar davomida Fuqaro muhofazasi instituti tomonidan ishlab chiqilgan zilzila va boshqa favqulodda vaziyatlarda to‘g‘ri harakat qilish bo‘yicha buklet, plakat, jurnal, flayer, kitob, uslubiy qo‘llanmalar hamda surdo tarjimon ishtirokidagi videoqo‘llanmalarni ta’lim muassasalari va aholi o‘rtasida targ‘ib etish masalalari muhokama qilindi.
Tadbirda Maktabgacha va maktab ta’limi boshqarmasi tasarrufidagi maktabgacha ta’lim tashkilotlari, umumiy o‘rta va ixtisoslashtirilgan ta’lim muassasalari, professional va oliy ta’lim muassasalari rahbarlari, shuningdek, mahalla fuqarolar yig‘inlari raislari ishtirok etdi.
Seminar yakunida ishtirokchilarga favqulodda vaziyatlarda to‘g‘ri harakat qilish ko‘nikmalarini oshirishga xizmat qiluvchi 890 dona turli mavzulardagi buklet, plakat, jurnal, flayer, kitob va uslubiy qo‘llanmalar tarqatildi.
Mazkur targ‘ibot tadbirlari respublikaning barcha hududlarida izchil davom ettirilmoqda.