Surxondaryo viloyatining Uzun tumanida sel hodisalari bilan bog‘liq favqulodda vaziyatlarning oldini olish maqsadida qirg‘oq mustahkamlash tadbirlari olib borilmoqda
2026-06-16 09:55:00 / Yangiliklar
Joriy yilning may oyida kuzatilgan kuchli yog‘ingarchiliklar natijasida yuzaga kelgan sel oqibatlarini bartaraf etish hamda kelgusidagi xavflarni kamaytirish maqsadida Uzun tumanida qirg‘oq mustahkamlash ishlari izchil olib borilmoqda.
Xususan, tumandagi “Bobotog‘”, “Toltug‘ay”, “Oqmachit” va “Yangiobod” mahalla fuqarolar yig‘inlari hududlaridan oqib o‘tuvchi soylar qirg‘oqlarida mustahkamlash, o‘zanlarni tozalash va suv o‘tkazish inshootlarini yaxshilash ishlari amalga oshirilmoqda.
Olib borilayotgan ishlar bilan Surxondaryo viloyati hokimi, fuqaro muhofazasi boshlig‘i Ulug‘bek Qosimov tanishdi. Tashrif davomida viloyat Favqulodda vaziyatlar boshqarmasi boshlig‘i podpolkovnik Sh. Shukurov tomonidan bajarilgan hamda istiqbolda rejalashtirilgan tadbirlar yuzasidan taqdimot qilindi.
Mazkur ishlar aholi punktlari va infratuzilma obyektlari xavfsizligini ta’minlash, sel xavfini kamaytirish hamda hududlarning barqarorligini mustahkamlashga xizmat qilmoqda.