Favqulodda vaziyatlar vaziri general-mayor Azizbek Ikramov armrestling sport turi boʻyicha Osiyo chempionati sovrindori boʻlgan FVV akademiyasi kursanti Islom Ibodovni taqdirladi
2026-06-15 12:40:00 / Yangiliklar
Joriy yilning 11–12-iyun kunlari Qirgʻiziston Respublikasining Issiqkoʻl viloyatida armrestling sport turi boʻyicha Osiyo chempionati boʻlib oʻtdi. Ushbu nufuzli chempionatda 20 dan ortiq davlatlardan sportchilar ishtirok etib, yuqori saviyadagi bellashuvlar tashkil etildi.
Mazkur chempionatda Oʻzbekiston Respublikasi terma jamoasi safida FVV Akademiyasi kursanti Islom Ibodov ham muvaffaqiyatli ishtirok etib, yuksak natijalarni qayd etdi.
Musobaqa yakunlariga koʻra, 70 kg vazn toifasida Islom Ibodov chap qoʻl bahslarida faxrli 2-oʻrinni egallab, kumush medalga sazovor boʻldi. Shuningdek, oʻng qoʻl yoʻnalishida ham mahoratli ishtirok etib, faxrli 3-oʻrinni qoʻlga kiritdi va bronza medal bilan taqdirlandi.
Fursatdan foydalanib, Osiyo chempionatida yurtimiz sharafini munosib himoya qilib, yuqori natijalarga erishgan hamkasbimizni samimiy muborakbod etamiz.