Favqulodda vaziyatlar vazirligi Akademiyasida Favqulodda vaziyatlar vazirining birinchi o‘rinbosari hamda Akademiya professor-o‘qituvchilari ishtirokida davra suhbati bo‘lib o‘tdi.
2026-06-04 20:40:00 / Yangiliklar
Dastlab, muloqot davomida malakali kadrlar tayyorlash, ta’lim sifatini oshirish, ilmiy-tadqiqot faoliyatini rivojlantirish hamda zamonaviy yondashuvlarni ta’lim jarayoniga keng joriy etish masalalari muhokama qilindi. Shuningdek, professor-o‘qituvchilarning ilmiy salohiyatini yuksaltirish, nazariya va amaliyot uyg‘unligini ta’minlash hamda kadrlar tayyorlash tizimini yanada takomillashtirishga qaratilgan ustuvor vazifalar yuzasidan fikr almashildi.
Tadbirning ikkinchi qismida ilmiy va pedagogik faoliyatda yuqori natijalarga erishib kelayotgan bir guruh professor-o‘qituvchilar Favqulodda vaziyatlar vazirining tegishli buyrug‘iga asosan munosib rag‘batlantirildi.
Xususan, Qutqaruv texnikalari kafedrasi dotsenti, texnika fanlari bo‘yicha falsafa doktori (PhD), podpolkovnik Sherali Asamov hamda Harbiy va jismoniy tayyorgarlik kafedrasi dotsenti, texnika fanlari bo‘yicha falsafa doktori (PhD), kapitan Jasurbek Yarbekov vazirlik rahbariyati tomonidan har biri 10 million so‘m miqdoridagi pul mukofoti bilan taqdirlandi.
Ochiq va samimiy ruhda o‘tgan muloqot yakunida professor-o‘qituvchilarning taklif va tashabbuslari tinglanib, Akademiyada ta’lim va ilmiy faoliyat samaradorligini yanada oshirishga qaratilgan ustuvor vazifalar belgilab olindi.