Favqulodda vaziyatlar vaziri Azizbek Ikramov boshchiligidagi delegatsiyasi Koreya Respublikasida boʻlib oʻtgan qator xalqaro tadbirlarda ishtirok etdi
2026-05-22 14:30:00 / Yangiliklar
Xususan, joriy yilning 20-22-may kunlari Koreya Respublikasining Tegu shahrida nufuzli “International Fire & Safety Expo Korea 2026” xalqaro koʻrgazmasi boʻlib oʻtdi. Unda dunyoning yetakchi ishlab chiqaruvchilari tomonidan yaratilgan eng soʻnggi yongʻin-qutqaruv texnikalari namunalari hamda favqulodda vaziyatlarni bartaraf etish texnologiyalari namoyish etildi. Koʻrgazma davomida Oʻzbekiston Respublikasi Favqulodda vaziyatlar vazirligi mutaxassislari kelgusida qutqaruv tizimini jihozlashda qoʻllash mumkin boʻlgan zamonaviy texnik vositalarning xususiyatlari bilan yaqindan tanishdilar.
Tashrifning eng muhim voqealaridan biri Oʻzbekiston Respublikasi Favqulodda vaziyatlar vazirligi hamda Koreya Respublikasi Milliy yongʻin agentligi oʻrtasidagi ikki tomonlama uchrashuv hamda oʻzaro hamkorlik toʻgʻrisidagi Anglashuv memorandumining imzolanishi boʻldi. Ushbu tadbir doirasida ikki mamlakat qutqaruv idoralari rahbarlari – Azizbek Ikramov va Sing Ryong Kim qator yoʻnalishlarda hamkorlikni yanada kengaytirishga kelishib oldilar.
Tashrif doirasida delegatsiya aʼzolari yongʻin-qutqaruv qismiga tashrif buyurib, u yerda Koreyaning favqulodda vaziyatlarni bartaraf etish boʻyicha tajribasi bilan tanishdi.