Favqulodda vaziyatlar vazirligi rahbariyati tomonidan tizimda korrupsiyaviy holatlarni oldini olish va bunday illatga yo‘l qo‘ymaslik bo‘yicha tezkor yig‘ilish o‘tkazildi
2026-04-26 13:45:00 / Yangiliklar
Kuni kecha, Toshkent viloyati FVBB, Bo‘stonliq tumani Ixtisoslashgan ko‘p tarmoqli boshqarmasi boshlig‘i xizmat mavqeidan foydalangan holda, tadbirkordan ta'magirlik yo‘li bilan pul talab qilgan va ushbu pulni olgan vaqtda huquqni muhofaza qiluvchi organlar tomonidan ashyoviy dalillar bilan ushlangan.
Shu munosabat bilan, FVV markaziy apparatida o‘tkazilgan videoselektr yig‘ilishda ushbu holat tanqidiy muhokama qilinib, tizimda korrupsiyaviy holatlarni oldini olish, harbiy intizomni mustahkamlash, xizmat davrida shaffoflik va adolat tamoyillariga rioya etish, xodimlarning mas'uliyatini oshirish va kasbiy etika qoidalariga amal qilish kabi masalalar yuzasidan yana birbor qa'tiy ogohlantirildi.
Yig‘ilishda shaxsiy tarkibga korrupsiyaviy holatlarni oldini olish borasidagi tadbirlar huquqni muhofaza qiluvchi organlar va FVV hamkorligida tashkil etilayotganligi, shu bilan birga, tizimda korrupsiyaga moyilligi bor xodimlarga o‘rin yo‘qligi ta'kidlab o‘tildi.
Shuningdek, korrupsion holatlarni o‘z vaqtida oldini olishga yetarlicha e'tibor qaratmaganligi sababli Toshkent viloyati Favqulodda vaziyatlar bosh boshqarmasi boshlig‘i va uning o‘rinbosarlariga intizomiy chora ko‘rildi.
Yig‘ilish yakunida, ogohlikni oshirish va profilaktik tadbirlarni kuchaytirish bo‘yicha mas'ullarga topshiriqlar berildi.
Hurmatli fuqarolar! Eslatib o‘tamiz, Favqulodda vaziyatlar vazirligi xodimlari tomonidan korrupsiya holatlariga duch kelsangiz, zudlik bilan "1109" qisqa raqamli ishonch telefoniga murojaat qiling.