O‘zbеkistоn Rеspublikаsi Favqulodda vaziyatlar vazirligi

Xususan, Toshkent shahar Uchtepa tumanida FVV Akademiyasi rahbariyati, Toshkent shahar FVBB, tuman hokimligi hamda daxldor tashkilotlar hamkorligida ofitserlarni qayta tayyorlash va malaka oshirish kursi tinglovchilari bilan amaliy yoʻnaltirilgan yoʻriqnoma tadbiri tashkil etildi.

Yoʻriqnoma avvalida Akademiya boshligʻi yuridik fanlari doktori professor polkovnik M.Mamasiddiqov soʻzga chiqib, malaka oshirish jarayonlari zamonaviy talablar asosida dual taʼlim tamoyiliga muvofiq, yaʼni nazariya va amaliyot uygʻunligida olib borilayotgani taʼkidladi. Shuningdek, tinglovchilarning poytaxtimizning barcha tumanlarida mahallabay va xonadonbay tamoyili asosida oʻtkaziladigan keng qamrovli profilaktik tadbirlarda faol ishtirok etishi, amaliyot jarayonida uchrayotgan real muammolarni oʻrganishi, tahlil qilishi hamda ularni bartaraf etish yuzasidan asosli takliflar ishlab chiqishi muhimligini qayd etib oʻtdi.

Tadbir davomida Akademiya professor-oʻqituvchilari, tuman inspektorlari, tuman hokimligi masʼullari hamda tegishli xizmatlar xodimlariga mutaxassislar tomonidan dolzarb vazifalar ijrosini samarali tashkil etish, profilaktik tadbirlarni sifatli amalga oshirish, xizmat intizomini mustahkamlash va idoralararo hamkorlikni kuchaytirish masalalari yuzasidan atroflicha tushuntirishlar berildi. Shuningdek, amaliy faoliyatga oid aniq vazifalar va topshiriqlar belgilab berildi.

Shundan soʻng Abdulla Qodiriy mahallasida navbatdagi keng koʻlamli profilaktik tadbir tashkil etildi.

Tadbir doirasida aholi xonadonlarida yongʻin xavfsizligi, gaz va elektr jihozlaridan toʻgʻri foydalanish, favqulodda vaziyatlarda toʻgʻri harakatlanish qoidalariga oid tushuntirish ishlari olib borildi. Shuningdek, fuqarolarga amaliy tavsiyalar berilib, mavjud xavf-xatarlarni bartaraf etish boʻyicha tegishli koʻrsatmalar yetkazildi.

Jarayonda tumanda joylashgan "Izza qurilish bozorida" ham keng qamrovli profilaktik tadbirlar oʻtkazilib, bozorda faoliyat yuritayotgan bozor ishchilari va tadbirkorlar bilan keng qamrovli tartibot-tashviqot ishlari olib borildi.

Mazkur profilaktik tadbirlar aholi va tadbirkorlik subyektlari oʻrtasida xavfsizlik madaniyatini yuksaltirish, savdo va xizmat koʻrsatish obyektlarida barqaror va xavfsiz muhitni taʼminlashga xizmat qilmoqda.