O‘zbеkistоn Rеspublikаsi Favqulodda vaziyatlar vazirligi

Mazkur ilmiy-amaliy anjuman O‘zbekiston Respublikasi Prezidentining 2025-yil 20-oktabrdagi “Aholi va hududlarni favqulodda vaziyatlardan ishonchli muhofaza qilish sohasini sifat jihatidan yangi bosqichga ko‘tarish to‘g‘risida”gi PF–185-sonli Farmoni, “Favqulodda vaziyatlar organlari faoliyatini yanada takomillashtirishga doir tashkiliy chora-tadbirlar to‘g‘risida”gi PQ–310-sonli hamda “Favqulodda vaziyatlardan muhofaza qilish sohasini raqamlashtirish hamda ilmiy va innovatsion faoliyatni rivojlantirish chora-tadbirlari to‘g‘risida”gi PQ–311-sonli Qarorlari ijrosini ta’minlash maqsadida tashkil etildi. 

Ilmiy-amaliy anjumanda O‘zbekiston Respublikasi favqulodda vaziyatlarni boshqarish milliy markazi boshlig‘i, O‘zbekiston Respublikasi FVV Aloqa va servislarga xizmat ko‘rsatish va aloqa tarmoqlari guruhi boshlig‘i, “FARG‘ONAAZOT” AJ Favqulodda vaziyatlar boshqarmasi boshlig‘i , O‘zbekiston Respublikasi FVV Akademiyasi huzuridagi Fuqaro muhofazasi instituti “Favqulodda vaziyatlarni bartaraf etish” kafedrasi dotsenti, FVV Akademiyasi rahbariyati, professor-o‘qituvchilari, ilmiy tadqiqotchilar, hududiy qutqaruv tuzilmalari mutaxassislari, ishlab chiqarish korxonalari va hamkor tashkilotlar hamda OAV vakillari ishtirok etdi.

Anjuman davomida soha mutaxassislari tomonidan qutqaruv tuzilmalarining faoliyatini takomillashtirish, yong‘in va gaz xavfini erta aniqlashga qaratilgan intellektual monitoring tizimlarini joriy etish, korxona fuqaro muhofazasi tuzilmalarining favqulodda vaziyatlar xizmatlari bilan o‘zaro hamkorligini rivojlantirish, shuningdek, qutqaruv xizmatlari shaxsiy tarkibining kasbiy tayyorgarligini oshirish masalalariga bag‘ishlangan ilmiy-amaliy ma’ruzalar qilindi.

Ma’ruzalar yuzasidan o‘tkazilgan muhokamalar davomida favqulodda vaziyatlarni bartaraf etish tizimini yanada rivojlantirish, qutqaruv xizmatlari o‘rtasida o‘zaro hamkorlikni mustahkamlash, ilg‘or texnologiyalarni amaliyotga keng joriy etish bo‘yicha aniq xulosa va takliflar ishlab chiqildi.

Anjuman yakunida tadbirning yuqori saviyada tashkil etilgani, ko‘tarilgan masalalarning dolzarbligi va amaliy ahamiyati alohida e’tirof etildi. Bildirilgan taklif va tavsiyalar favqulodda vaziyatlardan muhofaza qilish tizimini sifat jihatidan yangi bosqichga olib chiqish, qutqaruv xizmatlari faoliyatini yanada samarali tashkil etish hamda aholi va hududlar xavfsizligini ta’minlashga xizmat qilishi qayd etildi.

Anjumandan koʻzlangan asosiy maqsad - favqulodda vaziyatlarni bartaraf etish tizimini yanada takomillashtirish, qutqaruv xizmatlari va qutqaruv tuzilmalarining samaradorligini oshirish, hududlar hamda ishlab chiqarish obyektlarida yuzaga kelishi mumkin bo‘lgan favqulodda vaziyatlarning oldini olish mexanizmlarini kuchaytirish, yong‘in va portlash xavfini kamaytirish, shuningdek, zamonaviy raqamli texnologiyalar va innovatsion ilmiy yondashuvlarni amaliyotga joriy etishdan iboratdir.