O‘zbеkistоn Rеspublikаsi Favqulodda vaziyatlar vazirligi

Ma’ruzada mahallalarda profilaktika tadbirlarini “mahallabay” va “xonadonbay” amalga oshirish mexanizmlarining joriy etilgani, har bir inspektorga 4 ta mahalla biriktirilgani, shuningdek “Mahallamizni favqulodda vaziyatlardan himoyalangan hududga aylantiramiz” shiori asosida ishlar olib borilishi ta’kidlandi. Bu tadbirlarini amalga oshirish mahalla yettiligi va inspektorlar hamkorligida bajarilishi alohida qayd etildi. Shuningdek, har bir mahalla uchun alohida “Xavf indikatori” ishlab chiqilib, xonadonlar xavf darajasiga ko‘ra “qizil”, “sariq” va “yashil” toifalarga ajratilayotgani, “qizil” toifadagi xonadonlarda kuchaytirilgan profilaktika tadbirlari o‘tkazilayotgani va ularni bosqichma-bosqich “yashil” toifaga o‘tkazish choralari ko‘rilayotgani ta’kidlandi. Inspektorlarning “eksteritorial” tamoyil asosida faoliyat yuritishi, ya’ni “yashil” hudud inspektorlarining “qizil” hududlarga biriktirilishi haqida tushuntirishlar berildi. Mahalla fuqarolari yig‘inlari hamda huquq-tartibot bo‘linmalarida “Mahalla muhofazasi” xonalari tashkil etilishi, profilaktika tadbirlarining to‘liq raqamlashtirilishi hamda jarayonlarga mahalla yettiligi va jamoatchilikning keng jalb etilishi masalalari yoritildi. Bundan tashqari, yoshlar o‘rtasida “volontyor”, aholida esa “ko‘ngilli qutqaruvchi” va “Favqulodda vaziyatlar volontyori” jamoalarini shakllantirish, shuningdek “Biz birgamiz!” umumxalq harakatini amalga oshirish haqida ham ma’lumot berildi.