Yangi mavsum — yangi sahifa, har bir o‘yin — imtihon, har bir g‘alaba — xalqimizga bayram!
2026-02-28 22:20:00 / Yangiliklar
O‘zbekiston Superligasining yangi mavsumiga start berildi. Birinchi tur uchrashuvida amaldagi chempion — "Neftchi" o‘z maydonida Muborakning "Mash’al" jamoasini qabul qildi.
Uchrashuv Farg‘ona shahridagi "Istiqlol" stadionida bo‘lib o‘tdi.
Ochilish marosimida viloyat hokimi Xayrullo Bozorov ishtirok etib, futbol muxlislarini yangi mavsum bilan qutladi.
Mamlakatimizda futbolni rivojlantirish borasida Prezident Shavkat Mirziyoyev boshchiligida keng ko‘lamli islohotlar amalga oshirilayotganligi, klublar infratuzilmasi mustahkamlanayotganligi, Superliga, Pro liga o‘yinlari saviyasi izchil o‘sib borayotganligini e’tirof etdi.
Mahallalardan boshlab futbolni rivojlantirishning vertikal tizimi shakllantirilib, yangi futbol maktablari va akademiyalar tashkil etilayotgani, ushbu sa’y-harakatlar natijasi sifatida milliy terma jamoamizning tarixiy yutuqlari faxr bilan tilga olindi.
Shuningdek, futbolda adolat va shaffoflik tamoyillari mustahkamlanayotgani, hakamlik saviyasi oshib borayotgani alohida qayd etildi. Bu borada O‘zbekiston futbol assotsiatsiyasi hamda Professional futbol ligasi rahbariyatining hissasi e’tirof etildi.
Viloyat hokimi joriy yilda klub infratuzilmasini yanada rivojlantirish borasida ustuvor vazifalar belgilab olinganini qayd etdi.
Zamonaviy talablarga javob beradigan “Neftchi” akademiyasi tashkil etilib, yaqin kunlarda ochilishi, yosh iste’dodlarni saralash va tarbiyalash tizimi kuchaytirilishi, “Istiqlol” stadionini kengaytirish va modernizatsiya qilish loyihalari ishlab chiqilgani ma’lum qilindi.
Ushbu sa’y harakatlardan asosiy maqsad Farg‘onani mamlakatimizning futbol poytaxtiga aylantirish ekanligi ta’kidlandi. Joriy mavsumda chempionlikka erishish majburiyat, Osiyo elita ligasida g‘alaba qozonish maqsad qilib belgilangani yana bir bor aytib o‘tildi.
Tadbir davomida “Neftchi” futbolchilariga yuksak ishonch bildirildi. Qayd etilganidek, jamoa maydonga shunchaki klub emas, balki Farg‘onaning oriyati, g‘ururi va ishonchi sifatida chiqadi. Yangi mavsum — yangi sahifa, har bir o‘yin — mas’uliyat, har bir g‘alaba — xalqimiz uchun bayram ekani ta’kidlandi.
Jonkuyar muxlislarga ham minnatdorlik bildirilib, ularning qo‘llab-quvvatlovi jamoaning asosiy kuchi ekani aytildi.
Shundan so'ng ikki jamoa a’zolari tanishtirilib, o‘yin boshlandi.
Shiddat bilan boshlangan o‘yinning 9-daqiqasida Boyan Siger tomonidan aniq yo‘llangan top darvoza to‘ridan joy oldi. 30-daqiqada Stipe Peritsa jamoamizning 2-goliga mualliflik qildi. Bellashuvning 75-daqiqasida esa Zoran Marushich 3-golni o‘z nomiga yozdirib qo‘ydi.
Bugun Islom Ismoilov shogirdlari yangi mavsumni g‘alaba bilan boshladi.