Viloyat hokimi Xayrullo Bozorov Germaniyaning “Alcon Development Group” kompaniyasi boshqaruv direktori Ziya Gaziyev boshchiligidagi delegatsiyani qabul qildi
2026-02-27 17:25:00 / Yangiliklar
Muloqot davomida o‘zaro kelishuvlar doirasida amalga oshirilishi rejalashtirilayotgan istiqbolli loyiha — g‘o‘zapoyani qayta ishlash orqali biochar (maxsus ko‘mir) ishlab chiqarish loyihasi muhokama qilindi. Uni amalga oshirish mexanizmlari, xom ashyo ta’minoti, fermerlar bilan samarali hamkorlikni yo‘lga qo‘yish masalalari atroflicha ko‘rib chiqildi.
Kompaniya vakillari loyiha hujjatlari to‘liq tayyorlanganini, yaqin kunlarda qurilish-montaj ishlarini boshlash rejalashtirilayotganini ma’lum qildi. Loyiha doirasida yangi ish o‘rinlari yaratilishi qayd etildi.
Viloyat hokimi loyihaning iqtisodiy va ekologik ahamiyati yuqori ekanini ta’kidlab, uni muvaffaqiyatli amalga oshirish uchun zarur tashkiliy va amaliy ko‘mak ko‘rsatilishini bildirdi.
Uchrashuv yakunida loyihani bosqichma-bosqich ishga tushirish yuzasidan hamkorlikdagi aniq vazifalar belgilab olindi.