Chuqur bilim va umuminsoniy qadriyatlar - talaba yoshlarning bosh maqsadi bo‘lishi kerak
2026-02-10 17:45:00 / Yangiliklar
Uchrashuvda viloyat hokimi yoshlar bilan ilm olishning ahamiyati, bilim yo‘lidagi mashaqqatlarga bardoshli bo‘lish, vaqtni qadrlash masalalari xususida atroflicha fikr bildirdi. Shuningdek, talabalar nafaqat chuqur bilim egasi, balki umuminsoniy fazilatlar, qadriyatlarni o‘zida mujassam etgan, axloq-odobli, yuksak ma’naviyatli inson, yetuk kadrlar bo‘lib kamol topishi zarurligini ta’kidladi.
Samimiy muloqot davomida vatanparvarlik, yurtga sadoqat, milliy qadriyatlarga hurmat mavzulariga alohida e’tibor qaratildi.
Viloyat hokimi bugungi globallashuv sharoitida dunyoda yuz berayotgan voqea-hodisalar va turli tahlikalar misolida Vatan tinchligi, osoyishtaligi va uning bebaho ne’mat ekanini tushuntirib o‘tdi. Shuningdek, Vatanni sevish oiladan boshlanishi, o‘z yaqinlarini qadrlagan insonning yurtga bo‘lgan muhabbati ham yuksak bo‘lishi alohida ta’kidlandi. Hayotni yaxshilik, ezgulik va bunyodkorlik bilan mazmunli qilish muhimligi aytildi.
Uchrashuvda talabalar ham so‘z olib, davlatimiz tomonidan yaratilayotgan keng imkoniyatlar tufayli erishayotgan yutuqlari, ilmiy va ijodiy izlanishlari haqida fikr bildirdilar. Yoshlar ta’lim sohasiga qaratilayotgan e’tibor va yaratilayotgan shart-sharoitlar uchun Prezidentimizga minnatdorlik bildirdilar.
Yakunda bunday ochiq va samimiy muloqotlar kelgusida ham davom ettirilishi ma’lum qilindi.
Uchrashuvda Farg‘ona davlat universiteti rektori Bahodirjon Shermuhammadov har ishtirok etdi.
Ma’lumot o‘rnida: universitetda joriy o‘quv yilida talabalar orasida O‘zbekiston Respublikasi Prezidenti stipendiyasi, Bobur, Pahlavon Mahmud hamda Mirzo Ulug‘bek nomidagi davlat stipendiyalari, shuningdek, 14 nafar talaba Alisher Navoiy nomidagi davlat stipendiyasi sohibi bo‘ldi.