Farg‘оnа vilоyati hоkimligi

Uchrashuv davomida koreyalik investorlar tomonidan axborot texnologiyalari, ta’lim sohasida amalga oshirilayotgan investitsion loyihalar, shuningdek, kelgusida rejalashtirilayotgan istiqbolli tashabbuslar atroflicha muhokama qilindi.

Xususan, “AHA Co., Ltd” kompaniyasi rahbari Ku Gi Do Farg‘ona shahri Ekoshahar hududida barpo etilayotgan yangi ishlab chiqarish korxonasi bo‘yicha olib borilayotgan ishlar haqida ma’lumot berdi. Shuningdek, Farg‘ona viloyatiga jalb qilinishi rejalashtirilayotgan yangi investitsion loyihalar, ta’lim va axborot texnologiyalari sohalarida grant loyihalarini jalb etish bo‘yicha takliflar bildirildi.

Ku Gi Do mazkur loyihalar doirasida koreyalik hamkorlar tomonidan ham Farg‘ona viloyatining turli yo‘nalishlariga investitsiya kiritish niyati borligini ta’kidlab, bugungi uchrashuvga ham koreyalik hamkori bilan tashrif buyurganini qayd etdi.

“Shindo Industry Co., Ltd” kompaniyasi rahbari Dong Xiyek Xvang yo‘l harakati xavfsizligini ta’minlashga qaratilgan zamonaviy uskunalarni Farg‘ona viloyatida amaliyotga tatbiq etish bo‘yicha hamkorlik qilish va investitsiya kiritish rejalari haqida to‘xtalib o‘tdi. Bu orqali yo‘l-transport hodisalari oqibatlarini kamaytirish, haydovchilar va piyodalar xavfsizligini oshirishda muhim ahamiyat kasb etishi ta’kidlandi.

Shuningdek, Dong Xiyek Xvang Farg‘onada parfyumeriya mahsulotlari ishlab chiqarish bo‘yicha loyihalarni amalga oshirishni rejalashtirgani, bu borada Farg‘ona shahridagi KIUF universitetida mahsulotlarni targ‘iboti yo‘lga qo‘yilgani qayd etildi.

Viloyat hokimi Xayrullo Bozorov bildirilgan barcha taklif va loyihalar Farg‘ona viloyati uchun muhim ahamiyat kasb etishini ta’kidlab, ularni amalga oshirish bo‘yicha tegishli mas’ullar biriktirilishini hamda hamkorlikda aniq chora-tadbirlar ishlab chiqilishini qayd etdi.

Shu bilan birga, Farg‘ona viloyatiga grant loyihalarini jalb qilish dolzarb ekani ta’kidlanib, ushbu yo‘nalishda hamkorlikni yanada jadallashtirishga kelishib olindi.

Uchrashuv yakunida Farg‘ona viloyati hokimligi hamda “Shindo Industry Co., Ltd” kompaniyasi o‘rtasida o‘zaro hamkorlik memorandumi imzolandi.