Farg‘onada “Milliy armiya – ona yurt qalqoni, tinchligimiz posboni!” shiori ostida bayram tadbirlari ko‘tarinkilik bilan bo‘lib o‘tmoqda
2026-01-14 15:30:00 / Yangiliklar
Tadbirda so‘zga chiqqan viloyat hokimi Xayrullo Bozorov yig‘ilganlarni, barcha harbiy xizmatchilarni va ularning oila a’zolarini bayram bilan samimiy muborakbod etdi. So‘nggi yillarda Prezidentimiz tashabbuslari bilan amalga oshirilayotgan keng ko‘lamli islohotlar natijasida Qurolli Kuchlarimiz mamlakatimiz mustaqilligini, davlat chegaralarining daxlsizligini, xalqimizning tinch va osoyishta hayotini ta’minlashning ishonchli kafolatiga aylanib borayotgani ta’kidlandi.
Eng muhimi, xalq va armiya o‘rtasidagi hamjihatlik tobora mustahkamlanib, harbiy sohaning rivojiga yangi kuch va sifat bag‘ishlamoqda.
Ayniqsa, harbiy-ma’muriy sektorlar tashkil etilgani harbiy infratuzilmani rivojlantirish, xizmatchilar va ularning oila a’zolari uchun munosib ijtimoiy sharoitlar yaratish borasidagi ishlarni yangi bosqichga olib chiqqani qayd etildi. Mamlakatimizdagi tinchlik va barqarorlik taraqqiyotning muhim omili ekanligi, ilm-fanni, iqtisodiyotni rivojlantirish, mudofaani mustahkamlash va yurtimiz qudratini oshirish muhim vazifa bo‘lishligi aytib o‘tildi.
Viloyat rahbari kuni kecha O‘zbekiston Respublikasi Prezidenti, Qurolli Kuchlar Oliy Bosh Qo‘mondoni Shavkat Mirziyoyev raisligida o‘tkazilgan Xavfsizlik kengashining mamlakat harbiy xavfsizligi va mudofaasini mustahkamlash masalalariga bag‘ishlangan kengaytirilgan yig‘ilishi haqida ham to‘xtalib o‘tdi. Unda mamlakat xavfsizligini ta’minlash, mudofaa qobiliyatini oshirish bo‘yicha ustuvor vazifalar belgilab berilgani ta’kidlandi.
Tadbir davomida viloyat hokimi Prezidentimizning tegishli Farmoniga muvofiq taqdirlangan bir guruh harbiy xizmatchilar va huquqni muhofaza qilish organlari xodimlarini yana bor muborakbod etdi.
Bayram tantanalari davomida yurt tinchligi yo‘lida sidqidildan xizmat qilayotgan harbiylar va huquqni muhofaza qilish organlari vakillariga viloyat hokimining faxriy yorliqlari va esdalik sovg‘alari topshirildi.
Viloyat san’at ustalari ijrosidagi konsert dasturi, unda yangragan Vatanni ulug‘lovchi kuy-qo‘shiqlar, harbiy orkestr chiqishlari barchaga ko‘tarinki kayfiyat bag‘ishladi.