O‘zbekiston Respublikasi Maktabgacha va maktab taʼlimi vazirligi

Maktabgacha va maktab ta’lim vaziri Hilola Umarova Davlatimiz rahbari huzurida iqtidorli yoshlarni qo‘llab-quvvatlash tizimini takomillashtirishga oid  taqdimot  qildi.
Unda yoshlarimizning jahon darajasida bilim olish imkoniyatlarini to‘g‘ri yo‘naltirgan holda ularni dunyodagi eng ilg‘or universitetlarda o‘qishini ta’minlash, bu borada yangicha tizimni ishga solish zarurligi ta’kidlandi.

Shu maqsadda yangi o‘quv yilidan xalqaro maktab faoliyatini yo‘lga qo‘yish rejalashtirilayotganligi, unga dastlab 8-sinf bitiruvchilari orasidan eng iqtidorli 60 nafar o‘g‘il-qiz saralab olinishi aytib o‘tildi. O‘quv dasturi xalqaro andoza asosida ishlab chiqilgan —  asosiy, ixtisoslik hamda yetakchilik va ijtimoiy faollikni o‘rgatuvchi fanlardan iborat bo‘ladi.

Yig‘ilishda yoshlarni Amerikaning “Pechak ligasi” (The Ivy League) universitetlariga tayyorlashga doir mavjud rejalarga to‘xtalib o‘tildi. Buning uchun 6 bosqichli Milliy dastur qabul qilinib, dastlab 3 ming nafar o‘quvchi saralab olinadi.

Mazkur o‘quvchilarga Prezident va ixtisoslashgan maktablardan maslahatchilar biriktirilib,  ular Renessans oromgohida 3 haftalik intensiv o‘quv kurslarida o‘qitiladi. Yaxshi natija ko‘rsatgan 40 nafar o‘quvchi “Pechak ligasi” universitetlariga tajriba almashish uchun yuboriladi.

Taqdimot doirasida chet elda tahsil olib kelgan yoshlarni o‘z sohasi bo‘yicha munosib ish bilan ta’minlash uchun “Mamlakat oltin fondi hamjamiyati”ni tuzish taklif etildi. U orqali iqtidorli yoshlar yagona platformada birlashtiriladi, imtiyozlar, grantlar, startap dasturlari va boshqa imkoniyatlar yaratiladi.

Joriy yilning 25 mayida ta’lim islohotlari, iqtidorli yoshlar uchun yaratilgan imkoniyatlar, chet el oliygohlari tajribasiga doir qator mavzularda muloqot yo‘lga qo‘yiladi.