Шаҳрисабз шаҳри транспорт тизимини ривожлантириш бўйича таклифлар тақдим этилди
2026-09-25 17:55:00 / Янгиликлар
Бугун вилоят ҳокими Муротжон Азимов Шаҳрисабз шаҳрининг транспорт ва йўл-транспорт инфратузилмасини ривожлантириш бош режаси тақдимоти билан танишди.
Тақдимотда шаҳарда жамоат транспорти тизимини такомиллаштириш, самарали йўналишлар тармоғини шакллантириш, транспорт воситаларини янгилаш ҳамда йўл ҳаракати хавфсизлигини таъминлаш бўйича таклифлар илгари сурилди.
Шунингдек, янги автобус йўналишларини жорий этиш, бекатлар сонини кўпайтириш ҳамда чорраҳалардаги ҳаракатни замонавий бошқарув тизимлари асосида ташкил этиш масалаларига эътибор қаратилди.
Тақдимотда Шаҳрисабз шаҳрида 6 та янги жамоат транспорти йўналишини йўлга қўйиш таклиф этилди. Уларнинг умумий узунлиги 84,49 километр бўлиб, мавжуд 90 та бекатдан ташқари яна 186 та бекатга эҳтиёж мавжудлиги қайд этилди.
Чорраҳалардаги транспорт оқимини тартибга солиш бўйича ҳам аниқ таклифлар ишлаб чиқилган. Жумладан, светофор фазаларини оптималлаштириш, айрим чорраҳаларни қайта ташкил этиш ва йўл инфратузилмасини такомиллаштириш орқали тирбандликларни камайтириш кўзда тутилган.
Тақдимот якунида вилоят ҳокими томонидан шаҳарнинг транспорт ва йўл-транспорт инфратузилмасини ривожлантириш бўйича белгиланган вазифаларни сифатли ва ўз вақтида амалга ошириш, таклифларни чуқур ўрганиш ҳамда тегишли ишларни жадаллаштириш юзасидан масъулларга топшириқлар берилди.