Қашқадарёда улкан лойиҳа доирасида Голландиянинг юқори сифатли картошка уруғларини экиш ишларига старт берилди
2026-09-06 19:05:00 / Янгиликлар
Хабар берганимиздек, бугун вилоят ҳокими Муротжон Азимов бошчилигидаги раҳбарлар ва воҳамизнинг меҳнат фахрийлари иштирокида Нишон туманининг Туркманистон билан чегарадош олис ҳудудида озиқ-овқат хавфсизлигини таъминлаш, қишлоқ хўжалигида замонавий агротехнологияларни кенг жорий этиш ҳамда сифатли уруғлик картошка етиштиришни йўлга қўйишга қаратилган улкан лойиҳанинг навбатдаги босқичи, яъни “Bulung’ur – AgroStar” МЧЖ ва маҳаллий тадбиркор ҳамкорлигида 400 гектар майдонда Голландиядан келтирилган юқори сифатли элита авлодли картошка уруғларини экиш ишларига старт берилди.
Тадбир аввалида сўзга чиққан вилоят раҳбари мазкур лойиҳа аввало Президентимизнинг тадбиркорларга яратиб бераётган имкониятларининг натижаси эканлигини таъкидлаб, давлатимиз раҳбарининг топшириқларига кўра, Қашқадарё вилоятида озиқ-овқат хавфсизлигини таъминлашга хизмат қилишини айтиб, халқимиз дастурхонининг янада тўкин бўлишида катта аҳамият касб этишини билдириб ўтди.
Шундан сўнг, лойиҳани амалга оширилишида жонбозлик кўрсатиб келаётган бир қатор соҳа ходимлари вилоят ҳокими томонидан эътироф этилиб, уларга ташаккурнома ва эсдалик совғалари топширилди. Жонлиқ сўйилиб, хатми Қурон ўқилди. Юртимиз тинчлиги, дастурхонларимиз тўкинлиги ва мазкур далаларда ҳосиллар мўл бўлиши учун дуога қўл очилди.
Сўнгра ҳудудда Австриянинг “BAUER” компанияси томонидан ишлаб чиқарилган, 6 та замонавий ёмғирлатиб айланма усулида суғориш тизимини жорий этилганлиги (жами 16 та шундай суғориш тизими жорий этилади), насослар орқали сув етказиб бериш учун қувурларнинг тортилгани, 50 минг кубометр сиғимли сув сақлаш иншооти, электр таъминотини ва ерларни экишга тайёрлаш ишлари кўздан кечирилди.
Маълумот учун, ҳозирда ҳудудда 2600 гектар ер майдони ўзлаштирилиб, картошка етиштириш лойиҳасининг умумий қиймати 30 млрд сўмни ташкил этади ва бу орқали 10 минг тонна картошка уруғлик захираси яратилади. Шунингдек, музлаткичлар қуриш ва чорвачилик фермасини ташкил этиш каби ишлар босқичма-босқич амалга оширилиб, бу нафақат озиқ-овқат хавфсизлигини таъминлашга хизмат қилади, балки 500 та янги доимий иш ўринларини яратилиши натижасида аҳоли бандлигини таъминлаш ва уларнинг даромадларини оширишга хизмат қилади.