Қашқадарё вилояти ҳокимлиги

Хабар берганимиздек, пайшанба - ёшлар куни муносабати билан бугун вилоят ҳокими, туман (шаҳар) ҳокимлари ва бошқа масъул раҳбарлар Косон туманида бўлиб, у ерда бир қатор тадбирларда иштирок этди.

Хусусан, дастлаб раҳбарлар “Обод” маҳалласида ёшлар бандлигини таъминлаш ва уларнинг тадбиркорлик ташаббусларини қўллаб-қувватлаш юзасидан амалий семинарда иштирок этди. У ерда 16 нафар ёшларнинг ўз хонадонида балиқчилик фаолиятини йўлга қўйгани ва аҳоли томорқаларидан унумли фойдаланаётгани иштирокчиларда катта қизиқиш уйғотди. Вилоят ҳокими ҳовузларда балиқ парваришлаётган ёшлар билан суҳбат қилди. Жараёнлар давомида туман ҳокими ва вилоят Ёшлар ишлари бошқармаси томонидан амалга оширилаётган ишлар юзасидан маълумотлар берилди. Аҳамиятлиси, вилоят ҳокими маҳалладаги меҳнатсевар, деҳқон ва пиллакор оила томорқасига ташриф буюриб, уларга санатория учун бепул йўлланма тақдим этди.

Амалий семинар иштирокчиларининг кейинги манзили "Тинчлик" маҳалласи бўлиб, у ерда маҳаллий бюджет ҳисобидан ажратилган 3 млрд. сўм маблағ эвазига қурилиш-таъмирлаш ишлари олиб борилиши натижасида барча қулайликларга ва замонавий кўринишга келтирилган оилавий поликлиника биносининг очилиш маросимида иштирок этди. Ажабланарлиси шундаки, мазкур поликлиника ҳовлисида узоқдан келиб ишлайдиган шифокорлар учун барча шароитлар яратилган 2 та хизмат уйлари ҳам бунёд этилган.

Шунингдек, семинар тумандаги “Майдаёбу” маҳалласида давом этиб, бу ерда ПҚ–153-сонли қарор асосида захирадаги 55 гектар ер майдони 55 нафар ёшларга ажратиб берилгани, чорвачиликка ихтисослашган ушбу маҳаллада ёшлар ажратилган ерлардан унумли фойдаланиб, дастлаб қуёш панеллари ўрнатгани, қудуқлардан сув чиқариш орқали ерларни ёмғирлатиб суғориш имкониятини яратгани ва шундан сўнг чорва учун озуқа базасини шакллантириш мақсадида беда экиб, босқичма-босқич чорвачилик фаолиятини кенг йўлга қўйгани барча семинар қатнашчилари учун жуда фойдали бўлди.