Ўзбекистон Республикаси Президентининг 2023 йил 31 октябрдаги "Аҳолига пенсия тайинлаш бўйича кўрсатиладиган давлат хизматлари сифатини янада оширишга қаратилган қўшимча чора-тадбирлар тўғрисида"ги ПҚ-353-сон қарорининг 1-қисм «а» бандига асосан 2024 йил 1 январдан бошлаб фуқароларга давлат пенсияларини тайинлаш учун амалдаги тартибга қўшимча равишда уларнинг хоҳишига кўра Давлат хизматлари марказлари ёки Ягона интерактив давлат хизматлари портали орқали ҳам мурожаат қилиш ҳуқуқи берилди. Шунга асосан Пенсия жамғармаси томонидан ЯИДХ порталида «Пенсия тайинлаш учун ариза бериш» хизмати ишга туширилди. Ушбу хизмат ишга тушган кундан бошлаб жорий йилнинг 1 декабрига қадар фуқаролар томонидан 489 761 та ариза келиб тушган.

Ўзбекистон Республикаси Вазирлар Маҳкамасининг 2023 йил 20 ноябрдаги "Давлат хизматларини кўрсатишни тартибга солувчи норматив-ҳуқуқий ҳужжатларни тизимлаштириш чора-тадбирлари тўғрисида"ги 612-сон қарорининг 20-иловасига асосан Давлат хизматлари марказлари ва Ягона интерактив давлат хизматлари порталида «Пенсия жамғармаси ҳисобида туриши тўғрисида маълумотнома» хизмати ишга туширилди. Ушбу хизмат ишга тушган кундан бошлаб ҳозирги кунгача 446 669 маротаба фойдаланилган.

Фуқароларга ҳамда пенсия олувчи шахсларга қулайлик яратиш мақсадида Ягона интерактив давлат хизматлари порталида «Пенсия жамғармаси ҳудудий бошқармалари манзил маълумотлари» хизмати ишга туширилди. Ушбу хизмат ишга тушган кундан бошлаб жорий йилнинг 1 декабрига қадар фуқаролар томонидан 152 307 маротаба фойдаланилган.

Ўзбекистон Республикаси Вазирлар Маҳкамасининг 2023 йил 9 сентябрдаги “Вазирлар Маҳкамасининг «Давлат пенсияларини тайинлаш ва тўлаш тартиби тўғрисидаги низомни тасдиқлаш ҳақида» 2022 йил 13 октябрдаги 592-сон қарорига фуқароларнинг пенсия таъминотига оид миллий қонунчилик ҳужжатларини тизимлаштириш, соҳага замонавий ахборот технологияларини янада кенг жорий этишга қаратилган ўзгартириш ва қўшимчалар киритиш, шунингдек, ҳукуматнинг айрим қарорларини ўз кучини йўқотган деб ҳисоблаш тўғрисида”ги 481-сон қарорининг 1-қисм 2-бандига асосан пенсияни Давлат хизматлари маркази ёки Ягона интерактив давлат хизматлари порталига мурожаат қилиш орқали вақтинча тўхтатиб туриш тартибини жорий этиш вазифаси белгиланган. Шунга асосан Пенсия жамғармаси томонидан ЯИДХ порталида «Пенсия беришни тўхтатиб туриш» хизмати ишга туширилди. Ушбу хизмат ишга тушган кундан бошлаб жорий йилнинг 1 декабрига қадар фуқаролар томонидан 8 223 та ариза келиб тушган.

Пенcионерларга қулайлик яратиш мақсадида Давлат хизматлари марказлари ва Ягона интерактив давлат хизматлари порталида “«СМС-Пенсия» хизматига уланиш ва рақамни ўзгартириш” хизмати ишга туширилди. Ушбу хизмат ишга тушган кундан бошлаб жорий йилнинг 1 декабрига қадар фуқаролар томонидан 9 202 маротаба фойдаланилган.

Ташкилот ва идораларга қулайлик яратиш мақсадида Пенсия жамғармаси томонидан Давлат хизматлари марказлари ва Ягона интерактив давлат хизматлари порталида «Пенсия Қонунининг моддалари бўйича ҳисоботни шакллантириш» хизмати ишга туширилди. Ушбу хизмат ишга тушган кундан бошлаб жорий йилнинг 1 декабрига қадар фуқаролар томонидан 433 маротаба фойдаланилган.

Ўзбекистон Республикаси Вазирлар Маҳкамасининг 2023 йил 20 ноябрдаги "Давлат хизматларини кўрсатишни тартибга солувчи норматив-ҳуқуқий ҳужжатларни тизимлаштириш чора-тадбирлари тўғрисида"ги 612-сон қарорининг 21-иловасига асосан Давлат хизматлари марказлари ва Ягона интерактив давлат хизматлари порталида «Тўланган пенсиялар миқдори тўғрисида маълумотнома» хизмати ишга туширилди. Ушбу хизмат ишга тушган кундан бошлаб жорий йилнинг 1 декабрига қадар фуқаролар томонидан 430 627 маротаба фойдаланилган.

Ўзбекистон Республикаси Президентининг 2023 йил 31 октябрдаги "Аҳолига пенсия тайинлаш бўйича кўрсатиладиган давлат хизматлари сифатини янада оширишга қаратилган қўшимча чора-тадбирлар тўғрисида"ги ПҚ-353-сон қарорининг 1-қисм «б» бандига асосан 2025 йил 1 мартдан бошлаб фуқароларга ёшга доир пенсияларни «Фуқароларнинг давлат пенсия таъминоти тўғрисида»ги Ўзбекистон Республикаси Қонунининг 7-моддасида белгиланган ёшга тўлиши муносабати билан алоҳида мурожаат талаб этмаган ҳолда проактив шаклда тайинлаш тартиби жорий этилди. Ушбу проактив хизмат ишга тушган кундан токи жорий йилнинг 1 декабрга қадар 82 798 нафар фуқароларга ёшга доир пенсия проактив равишда тайинланди.

Ўзбекистон Республикаси Президентининг 2025 йил 27 майдаги "Ногиронлик пенсиялари ва компенсацияларни тайинлашда проактив хизматларни жорий этиш тўғрисида"ги ПҚ-194-сон қарорининг 1-қисм «а» бандига асосан 2025 йил 1 июлдан фуқароларга I ёки II гуруҳ ногиронлиги белгиланиши муносабати билан пенсияларни алоҳида мурожаат талаб этмаган ҳолда проактив шаклда тайинлаш тартиби жорий этилди. Ушбу проактив хизмат ишга тушган кундан токи жорий йилнинг 1 декабрига қадар 17 096 нафар фуқароларга ногиронлик пенсиялари проактив равишда тайинланди.

Ўзбекистон Республикаси Президентининг 2025 йил 27 майдаги "Ногиронлик пенсиялари ва компенсацияларни тайинлашда проактив хизматларни жорий этиш тўғрисида"ги ПҚ-194-сон қарорининг 1-қисм «б» бандига асосан 2025 йил 1 июлдан кўриш қобилияти бўйича I гуруҳ ногиронлиги бўлган шахсларга ҳамда ядро полигонлари ва бошқа радиация-ядро объектларида ҳарбий хизматни ўтаган шахсларга компенсацияларни электрон маълумотлар алмашинуви асосида проактив шаклда тайинлаш тартиби жорий этилди. Ушбу проактив хизмат ишга тушган кундан токи жорий йилнинг 1 декабрига қадар 370 нафар фуқароларга компенсациялар проактив равишда тайинланди.