Жиззах вилояти ҳокимлиги

Лойиҳа Германиянинг Халқ университетлари немис ассоциацияси DVV Internationalнинг Ўзбекистондаги филиали томонидан ажратилган 6 минг евро грант маблағи ҳисобидан молиялаштирилиб, вилоят «Қалб нури» маркази ҳамда вилоят Оила ва хотин-қизлар бошқармаси ҳамкорлигида амалга оширилди.

Лойиҳанинг якунларига бағишланган сарҳисоб йиғилиши вилоят ҳокимлиги ҳузуридаги Нодавлат нотижорат ташкилотлари уйида бўлиб ўтди. Унда Оила ва хотин-қизлар бошқармаси, Камбағалликни қисқартириш ва бандлик бошқармаси, Ижтимоий ҳимоя миллий агентлиги, «Тадбиркор аёл» ишбилармон аёллар ассоциацияси, Хотин-қизлар тадбиркорлик маркази, нодавлат нотижорат ташкилотлари ҳамда оммавий ахборот воситалари вакиллари иштирок этди.

Тадбир доирасида ўқув курслари қатнашчилари томонидан тайёрланган ҳунармандчилик ва амалий санъат намуналари кўргазмаси ташкил этилди. Шунингдек, икки ойлик ўқув дастурларида фаол қатнашиб, ҳунармандчилик, тадбиркорлик ва IT йўналишларида амалий кўникмаларга эга бўлган 86 нафар хотин-қизга сертификатлар топширилди.

Тадбирда вилоят ҳокими ўринбосари, Оила ва хотин-қизлар бошқармаси бошлиғи Гулнора Нормуродова хотин-қизларни касб-ҳунарга ўргатиш, уларнинг иқтисодий мустақиллигини таъминлаш ва бандлигини ошириш масалаларига тўхталди.

— Камбағалликни қисқартиришнинг энг самарали йўли инсонга билим ва касб беришдир. Айниқса, хотин-қизларнинг касбий салоҳиятини юксалтириш орқали оилаларнинг иқтисодий барқарорлигини мустаҳкамлаш мумкин, — деди у.

Қайд этилганидек, айрим ҳудудларда янги иш ўринлари яратилаётганига қарамасдан, аҳолининг меҳнатга бўлган қизиқишини янада кучайтириш долзарб вазифа бўлиб қолмоқда. Шу боис касб-ҳунар ўқувларини маҳаллаларнинг ўзида ташкил этиш, муваффақиятли тажрибаларни кенг оммалаштириш ва аҳолининг реал эҳтиёжларига асосланган лойиҳаларни амалга ошириш муҳим аҳамият касб этади.

Вилоят «Қалб нури» маркази директори Нодира Алимованинг таъкидлашича, лойиҳа доирасида Жиззах шаҳрининг Кимёгар маҳалласи ҳамда Пахтакор туманида махсус таълим ҳудудлари ташкил этилди. Ташкилотчилар маҳаллаларда хонадонбай тарғибот ишларини олиб бориб, аҳолини ўқув жараёнларига кенг жалб қилди. Бу эса қисқа муддат ичида курсларга қизиқишни ошириш ва иштирокчилар қамровини кенгайтириш имконини берди.

Лойиҳа доирасида рақамли ва медиасаводхонлик, тадбиркорлик, ҳунармандчилик, молиявий саводхонлик ҳамда шахсий ривожланишга бағишланган 20 та маҳорат дарси ташкил этилди. Машғулотларга давлат идоралари, банк муассасалари, тадбиркорлар уюшмалари, соғлиқни сақлаш ва ҳуқуқ соҳаси мутахассислари жалб қилинди.

Натижада 200 нафардан ортиқ иштирокчи янги билим ва амалий кўникмаларни эгаллади. Уларнинг бир қисми тадбиркорлар ҳузурида шогирд сифатида меҳнат фаолиятини бошлаган бўлса, яна бир қисми ҳунармандчилик ва хизмат кўрсатиш соҳаларида дастлабки буюртмаларини қабул қилиб, мустақил даромад манбаини шакллантиришга муваффақ бўлди.

Тадбир иштирокчилари таъкидлаганидек, мазкур лойиҳанинг энг муҳим натижаси ўтказилган машғулотлар ёки берилган сертификатлар эмас, балки иштирокчиларда ўз кучига ишонч, меҳнат қилишга интилиш ва иқтисодий мустақилликка эришиш истагининг мустаҳкамланганидир.

Йиғилиш якунида таълим ҳудудлари тажрибасини кенгайтириш хотин-қизлар бандлигини таъминлаш, аҳолининг иқтисодий фаоллигини ошириш ҳамда маҳаллаларнинг барқарор ривожланишини қўллаб-қувватлашда муҳим аҳамият касб этиши таъкидланди. Шунингдек, лойиҳанинг самарали тажрибасини вилоятнинг бошқа ҳудудларида ҳам жорий этиш режалаштирилаётгани маълум қилинди.