Жиззах вилояти делегацияси Кореянинг автомобилсозлик компанияси билан ҳамкорлик истиқболларини муҳокама қилди
2026-06-13 12:10:00 / Янгиликлар
Мазкур корхона автомобилсозлик саноати учун бутловчи қисмлар ишлаб чиқаришга ихтисослашган бўлиб, шунингдек, пресс-қолиплар (штамплар), махсус мосламалар ва технологик жиҳозларни лойиҳалаш ҳамда ишлаб чиқариш билан шуғулланади. Бугунги кунда компания “Hyundai” ва “KIA” каби йирик автомобил ишлаб чиқарувчиларига эҳтиёт қисмлар етказиб бериб келмоқда.
Ташриф давомида компания фаолияти билан яқиндан танишилиб, ўзаро ҳамкорлик истиқболлари юзасидан музокаралар ўтказилди. Учрашув чоғида компания раҳбарияти Жиззах вилоятида фаолият юритаётган автомобил ишлаб чиқарувчи корхоналар билан ҳамкорлик қилишга қизиқиш билдириб, ҳудудда янги инвестиция лойиҳаларини амалга ошириш истаги мавжудлигини маълум қилди.
Музокаралар якунлари бўйича томонлар автомобилсозлик соҳасида ҳамкорлик алоқаларини ривожлантириш, замонавий технологияларни жорий этиш ва истиқболли инвестиция лойиҳаларини амалга ошириш имкониятларини биргаликда ўрганишга келишиб олдилар.
Ушбу ҳамкорлик Жиззах вилоятида автомобилсозлик саноатини янада ривожлантириш, маҳаллийлаштириш даражасини ошириш ҳамда янги иш ўринларини яратишга хизмат қилиши кутилмоқда.