Жиззах вилояти ҳокимлиги

Ҳудудда жами 1609 қути пилла етиштириш режалаштирилган бўлиб, мавсум якунида 96 тонна пилла маҳсулотлари олиш кутилмоқда. Бу кўрсаткичлар туманда ипакчилик тармоғига бўлган эътибор ва тизимли ёндашув натижасидир. 

Айни пайтда туманда 7 та марказлашган ва 1 та мослаштирилган пиллахона фаолият юритмоқда. Ушбу масканларда пилла парвариши замонавий талаблар асосида ташкил этилиб, аҳолига қулай шароитлар яратилган. 

Бугунги кунда 400 дан ортиқ хонадонларда пилла боқилмоқда, натижада 3000 нафардан зиёд хотин-қизларнинг бандлиги таъминланди. Бу эса нафақат қишлоқ хўжалиги ривожига, балки аҳоли даромадларини оширишга ҳам хизмат қилмоқда. 

Туманда илғор тажрибалар ҳам шаклланиб бормоқда.
Хусусан, нафақат Пахтакор туманида, балки вилоятда ҳам биринчилардан бўлиб пилла етиштирган фермерлардан бири — “Азим-Бунёдбек” фермер хўжалиги раҳбари Ислом Мингжигитов ҳисобланади. У ўз фаолияти орқали нафақат юқори ҳосилга эришди, балки ижтимоий масъулиятни ҳам намоён этди. 

Мазкур хонадонда 6 қути пилла парвариш қилиниб, муваффақиятли етиштирилди. Энг эътиборлиси, фермер ўзининг 5 нафар оила аъзоси ҳамда 10 нафардан ортиқ қўшни аёлларни иш билан таъминлаб, уларнинг даромад манбаини яратди. Бу каби ташаббуслар жойларда бандликни таъминлаш ва аҳоли фаровонлигини оширишда муҳим омил бўлиб хизмат қилмоқда. 

Ҳозирги кунда Пахтакор туманида пилла йиғиштириш ишлари қизғин давом этмоқда. Об-ҳавонинг қулай келиши ҳамда агротехник тадбирларнинг ўз вақтида амалга оширилгани якуний натижаларнинг юқори бўлишига хизмат қилади. 

Умуман олганда, туманда ипакчиликни ривожлантириш, хонадонларда қўшимча даромад манбаларини яратиш ва хотин-қизлар бандлигини таъминлаш борасидаги ишлар изчил давом эттирилмоқда.

Бу эса ҳудуднинг иқтисодий салоҳиятини янада мустаҳкамлашга хизмат қилади.