Жиззах вилояти ҳокимлиги

Шу нуқтаи назардан, Жиззах вилоятида амалга оширилаётган қўзиқорин етиштириш лойиҳаси иқтисодий самарадорлик ва оқилона ташкилий ёндашувнинг амалий намунаси сифатида эътиборга молик.

Жанубий Мирзачўл магистрал канали бошқармаси тасарруфидаги “Пахтакор” автогаражи ҳудудидаги мавжуд бинодан унумли фойдаланган ҳолда вешенка навли қўзиқорин етиштириш йўлга қўйилди. Лойиҳа ривожлантириш жамғармаси маблағларини кўпайтириш, бюджетдан ташқари даромад манбаларини шакллантириш ҳамда қўшимча иш ўринлари яратиш мақсадида амалга оширилмоқда.

Дастлабки босқичда 70 та махсус полиэтилен қопларга жойлаштирилган тайёр субстратлар асосида ишлаб чиқариш жараёни бошланди. Натижада доимий иш ўрни яратилди ва маҳаллий аҳоли бандлиги таъминланди. Эътиборли жиҳати шундаки, лойиҳа катта капитал сармоя талаб этмасдан, мавжуд инфратузилма негизида ташкил этилди.

Қўзиқорин парвариши учун ажратилган хона агротехник талабларга мувофиқ жиҳозланган. Табиий ва мўътадил ёруғлик, 15–25 даража оралиғида барқарор ҳарорат ҳамда мунтазам шамоллатиш тизими юқори ҳосилдорликни таъминламоқда. Мутахассислар маълумотига кўра, вешенка қўзиқорини 10–15 кунда илк ўсиш босқичини ўтайди, 20–30 кун давомида ҳосил беради. Бир субстратдан бир теримда ўртача 3–4 килограмм, уч терим давомида эса 9–12 килограммгача маҳсулот олиш мумкин.

Иқтисодий жиҳатдан мазкур йўналиш юқори қўшимча қиймат яратиш имкониятига эга. Қўзиқорин бозорда талабгир бўлиб, парҳезбоп ва соғлом озиқ-овқат маҳсулоти сифатида эътироф этилган. Шу боис, ушбу лойиҳа нафақат даромад манбаи, балки аҳолини сифатли озиқ-овқат билан таъминлаш орқали ижтимоий барқарорликка ҳам ҳисса қўшмоқда.

Энг муҳими, лойиҳа бўш турган бинолардан самарали фойдаланиш орқали амалга оширилмоқда. Бу эса давлат ташкилотлари фаолиятида ресурс тежамкор ва натижага йўналтирилган бошқарув тамойиллари қарор топаётганини кўрсатади. Мазкур тажриба бошқа ҳудудларда ҳам қўллаш мумкин бўлган амалий модель сифатида аҳамиятга эга.

Келгусида субстратлар сонини кўпайтириш, ишлаб чиқариш ҳажмини босқичма-босқич кенгайтириш ва янги иш ўринлари яратиш режалаштирилган. Бу эса лойиҳанинг барқарорлиги ва узоқ муддатли иқтисодий самарадорлигини таъминлашга хизмат қилади.

Хулоса қилиб айтганда, кам харажат талаб этадиган, бироқ юқори даромад келтирадиган қўзиқоринчилик лойиҳалари ҳудудий иқтисодиётни мустаҳкамлаш, аҳоли бандлигини ошириш ва бюджетдан ташқари маблағлар улушини кенгайтиришда муҳим аҳамият касб этади. Бундай ташаббусларни изчил қўллаб-қувватлаш иқтисодий ислоҳотлар самарадорлигини янада оширади.