Зоминда муддатли ҳарбий хизматчилар учун имтиёзли тавсиянома олиш бўйича тест синовлари ўтказилди
2026-02-13 09:30:00 / Янгиликлар
Мазкур синовлар ҳарбий хизматни намунавий адо этаётган аскарларга республика олий таълим муассасаларига ўқишга киришда қўшимча имконият яратишга қаратилган.
Тадбир Ўзбекистон Республикаси Олий таълим, фан ва инновациялар вазирлиги ҳузуридаги Билим ва малакаларни баҳолаш агентлигининг Жиззах вилояти бўлими мутахассислари иштирокида ташкил этилди. Синовлар аввалида иштирокчиларга тест жараёнини ўтказиш тартиби ва баҳолаш мезонлари бўйича тушунтиришлар берилди.
Белгиланган тартибга мувофиқ, хизматчилар рақамлаштирилган қурилмалар орқали рўйхатдан ўтказилиб, аудиторияларга жойлаштирилди. 100 та саволдан иборат тест синовлари жанговар тайёргарлик, маънавий-маърифий билимлар, математика, физика ҳамда мантиқий фикрлаш йўналишларини қамраб олди. Максимал балл 110 этиб белгиланиб, синовни бажариш учун 3 соат вақт ажратилди.
Жараённинг очиқ ва шаффоф ўтиши таъминланиб, аудиториялар видеокузатув воситалари билан жиҳозланди.
Қайд этилишича, тест натижаларига кўра бериладиган имтиёзли тавсияномалар 3 йил муддат давомида амал қилади. Ушбу тавсияномалар ҳарбий хизматчиларнинг олий таълим олиш имкониятларини кенгайтириш ва билим салоҳиятини оширишга хизмат қилади.