Qaraqalpaqstan Respublikası Nókis qalasında xalıq ushın kóshpeli qabıllaw shólkemlestirildi
2025-05-14 20:35:00 / Новости
Kóshpeli qabıllawda xalıqtıń múrájatların úyreniw, olardı nátiyjeli sheshiw, xalıq penen ashıqtan-ashıq sóylesiw ornatıw hám anıqlanǵan mashqalalardı saplastırıw máselelerine ayrıqsha itibar qaratıldı.
Ilaj sheńberinde puqaralardan ishki isler organlarına baylanıslı jámi 155 múrájat qabıl etilip, hár tárepleme úyrenildi.
Múrájatlardı kórip shıǵıw procesinde puqaralardıń real talap hám mútájliklerin esapqa alǵan halda, uzaq jıllar dawamında sheshimin tappay kiyatırǵan mashqalalardı anıqlaw hám saplastırıwǵa ayrıqsha itibar qaratıldı.
Usınılǵan múrájatlardıń 62 si tiyisli tártipte unamlı sheshilgen bolıp, kórip shıǵılıwı ushın waqıt talap etkenligi sebepli 93 múrájattı úyreniw máselesi qatań qadaǵalawǵa alındı. Qabıllawda 13 puqara tárepinen minnetdarshılıq bildirilgen xatlar da usınıldı.
Sonday-aq, kóshpeli qabıllaw dawamında 17 puqaralıǵı bolmaǵan shaxslar mámleketimiz nızamshılıǵına muwapıq Ózbekstan Respublikası puqarası dep tán alınıp, olarǵa puqaralıq ID-kartaları saltanatlı túrde tapsırıldı.
Búgingi dáwirde ishki isler organları tárepinen orınlarda xalıq penen ashıqtan-ashıq sáwbetlesiwge ayrıqsha itibar qaratılmaqta. Barlıq dárejedegi basshılar tárepinen kóshpeli qabıllawlar, júzbe-júz ushırasıwlar hám múrájatlar menen islesiw sistemalı tiykarda shólkemlestirilmekte.