“O‘zbekkosmos” jamoasi - “Samarkand Marathon-2025” ishtirokchilari orasida!
2025-11-10 18:15:00 / Yangiliklar
So‘nggi yillarda yurtimizda sog‘lom turmush tarzini targ‘ib etuvchi sport tadbirlari tobora ommalashib bormoqda. Ayniqsa, yugurish - inson irodasi, matonati va birdamligining timsoliga aylangan. Shu ruhda 8-9 noyabr kunlari tarixiy Samarqand shahrida “Samarkand Marathon-2025” xalqaro xayriya yugurishi bo‘lib o‘tdi.
Bu yilgi marafonda 50 dan ortiq mamlakatlardan 8 mingdan ziyod ishtirokchi qatnashdi. Ular orasida “O‘zbekkosmos” agentligi xodimlari ham “Uzcosmos” jamoasi sifatida faol ishtirok etib, 2 km, 5 km, 10 km, 21 km va 42.2 km masofalarni muvaffaqiyatli bosib o‘tishdi. Har bir kilometr - irodani, sog‘lomlikni va jamoaviy ruhni ifodaladi.
Ahamiyatli tomoni shundaki, “Samarkand Marathon” 2019-yildan beri nafaqat sportni, balki xayriya g‘oyasini ham targ‘ib etib kelmoqda. Ishtirokchilardan tushgan mablag‘larning bir qismi bolalar uylari, nogironlar markazlari hamda ekologik loyihalarni qo‘llab-quvvatlashga yo‘naltiriladi. Shu tariqa yugurish nafaqat sog‘lom turmush timsoliga, balki ezgulik va birdamlik ramziga aylanadi. “O‘zbekkosmos” agentligi xodimlari bu ishlarning qismi ekanligidan juda ham mamnunmiz.
“O‘zbekkosmos” agentligi Axborot xizmati.