O‘zbekiston Respublikasi Maktabgacha va maktab taʼlimi vazirligi

Oʻzbekiston Respublikasi Prezidentining ““Prezident iqtidorli farzandlari” tashabbusini amalga oshirish chora-tadbirlari toʻgʻrisida”gi Farmoni qabul qilindi.

Farmon asosida Maktabgacha va maktab taʼlimi vazirligi hamda boshqa tegishli vazirlik va tashkilotlar hamkorligida “Prezident iqtidorli farzandlari” tashabbusi va uni qoʻllab-quvvatlash boʻyicha milliy dastur amalga oshiriladi. Unga koʻra:

Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi tizimida Al-Beruniy nomidagi xalqaro maktab-internati tashkil etiladi;

Iqtidorli yoshlarni qoʻllab-quvvatlash hamjamiyati faoliyati yoʻlga qoʻyiladi.

➖ Al-Beruniy nomidagi xalqaro maktab-internati umumiy faoliyati Maktabgacha va maktab taʼlimi vaziri raisligidagi Al-Beruniy nomidagi xalqaro maktab-internati kuzatuv kengashi tomonidan tashkil etiladi;

➖ Maktabda “Ikki komponentli boshqaruv tizimi” joriy etilib, oʻquv jarayonini tashkil etish va boshqarish akademik direktor, maʼmuriy-moliyaviy faoliyatni muvofiqlashtirish ijrochi direktor tomonidan amalga oshiriladi;

➖ Maktabda oʻquv jarayoni 2025-2026-oʻquv yilidan boshlanadi va bitiruvchilarga davlat namunasidagi taʼlim toʻgʻrisidagi hujjat (shahodatnoma) bilan bir qatorda yetakchi xorijiy oliy taʼlim tashkilotlariga oʻqishga kirish imkoniyatini beruvchi xalqaro darajadagi tegishli dastur diplomi (International Baccalaureate) beriladi;

➖ Maktab oʻquvchilari ingliz tilidan tashqari kamida yana bitta qoʻshimcha xorijiy tilga oʻqitiladi, har bir oʻquvchi ilmiy-tadqiqot yoki innovatsion startap loyihalari hamda boshqa ijtimoiy loyihalar boʻyicha oʻzining portfoliosini shakllantirishga ko‘mak beriladi;

➖ Maktab oʻquvchilarining umumiy cheklangan soni 180 nafarni tashkil etadi va ular davlat byudjeti mablagʻlari hisobidan oʻqitiladi;

☑️ Shuningdek, Ixtisoslashtirilgan taʼlim muassasalari agentligi markaziy apparatida:

➖ Al-Beruniy nomidagi xalqaro maktab-internati maslahatchilari faoliyatini muvofiqlashtirish uchun 14 ta shtat birligidan iborat Bosh maslahatchilar guruhi;

➖ 6 ta shtat birligidan iborat “Prezident iqtidorli farzandlari” tashabbusini amalga oshirish  boʻlinmasi tashkil etiladi;

👉 Bunda Bosh maslahatchi lavozimiga qabul qilingan xodimlar 14 ta hududga biriktiriladi hamda ularga Prezident maktablarining chet ellik mutaxassislari uchun belgilangan mehnatga haq toʻlash va moddiy ragʻbatlantirish shartlari tatbiq etiladi;

➖ Yangi Oʻzbekistonni barpo etish yoʻlida faol fuqarolik pozitsiyasini namoyon etgan, mamlakatimiz taraqqiyotiga hissa qoʻshayotgan, islohotlar jarayonida ilgʻor tashabbuslari, fidoyiligi va namunali faoliyati bilan ajralib turgan mutaxassislarni ragʻbatlantirish maqsadida “Yangi Oʻzbekiston poydevorlari” koʻkrak nishoni taʼsis etiladi.