O‘zbekiston Respublikasi Maktabgacha va maktab taʼlimi vazirligi

Bugun Maktabgacha va maktab taʼlimi vaziri Hilola Umarova, vazir oʻrinbosarlari, vazirlik masʼullari, hududiy boshqarmalar va tizim tashkilotlari rahbarlari ishtirokida navbatdagi  “Vazir soati” boʻlib oʻtdi.

Videokonferensiya shaklida tashkil etilgan tadbirda kuni kecha Davlatimiz rahbari boshchiligida tizimdagi islohotlar samaradorligini yanada oshirish, kelgusidagi ustuvor masalalar boʻyicha oʻtkazilgan videoselektorda belgilangan vazifalar ijrosi atroflicha muhokama qilindi.

Vazir Hilola Umarova kun tartibidagi masalalarga atroflicha toʻxtalib oʻtar ekan, yigʻilishda berilgan vazifalar ijrosini oʻz vaqtida va samarali tashkil etish uchun barcha masʼullar “favqulodda toʻqson kunlik” ish rejimiga oʻtib ish olib borishi zarurligini alohida qayd etdi.

Taʼkidlanganidek, bogʻchalarda bolalarga tarbiya bilan bir qatorda sifatli taʼlim berilsagina maktab taʼlimiga mustahkam tamal toshi qoʻyiladi. Shu bois endilikda ilgʻor xorijiy tajriba asosida maktabga tayyorlov guruhlari va boshlangʻich taʼlim oʻquv dasturlari oʻzaro uygʻunlashtiriladi.

Bunda Singapur bilan hamkorlikda bogʻcha bolalarini tanqidiy va kreativ fikrlashga oʻrgatadigan dasturlar ishlab chiqiladi.

“Eng asosiy maqsadimiz, bogʻchalarni kun davomida bolani faqat vaqtini oʻtkazadigan emas, ularning taʼlim olishlari uchun ilk koʻnikmalarni shakllantiradigan maskanga aylanishiga erishishdir. Shu sababli maktabgacha taʼlimda sifat samaradorligiga erishish kechiktirib boʻlmas masala ekanligini masʼullar his qilishi kerak”, — dedi vazir.

Shundan kelib chiqqan holda soha mutasaddilari oldiga bogʻcha tarbiyachilarining malakasi, mahorati, psixologik tayyorgarligini oshirish uchun kasbiy sertifikatlash tizimini joriy etish, iyun-avgust oylarida 7 mingta bogʻchalardagi 118 ming nafar tarbiyachini yangi dasturlar bilan ishlashga oʻrgatish vazifalari qoʻyildi.

Yigʻilishda pedagoglar malakasi va ularni tayyorlaydigan tizim samaradorligini oshirish boʻyicha vazirlik tizimidagi oliy va malaka oshirish oliygohlarining navbatdagi vazifalari belgilab berildi.

Bunga koʻra Nizomiy nomidagi Milliy pedagogika universiteti boshqaruv tizimi “Yangi Oʻzbekiston” oliygohi tajribasi asosida tubdan takomillashtiriladi hamda barcha pedagogika oliygohlari faoliyati rivojlantiriladi.

Shuningdek, shu yilning oʻzida pedagogika oliygohlari, malaka oshirish markazlari hamda har bir tumandan kamida 5 nafardan oʻqituvchi xorijiy davlatlarga malaka oshirishga yuboriladi.

Yigʻilishda oʻquvchilarni boʻsh vaqtini mazmunli oʻtkazish boʻyicha navbatdagi dolzarb masalalar ham muhokama qilindi.

Unga koʻra yozgi taʼtil davrida maktablarda sport maydonchasi va oʻquv xonalarida yoshlar uchun sport, fan va kasb toʻgaraklari tashkil etiladi. Yil yakuniga qadar bir million nafar oʻquvchi Oʻzbekiston boʻylab sayohatga jalb qilinadi. “Barkamol avlod” maktablari faoliyatini samarali yoʻlga qoʻyish boʻyicha yangi tizim yoʻlga qoʻyiladi.

Tadbir soʻnggida vazirlik masʼullari va hududiy boshqarma boshliqlarining kun tartibidagi mavzularga oid hisobotlari tinglandi.